\ഇസ്‌ലാമാബാദ്: ദരിദ്ര രാജ്യങ്ങളെ കടം കൊടുത്ത് വരുതിയിലാക്കുന്ന തന്ത്രം പാകിസ്താനു മേലും വിജയകരമായി നടപ്പാക്കി ചൈന. 450 കോടി ഡോളര്‍ കടം വാങ്ങിയതിന് ഇക്കഴിഞ്ഞ സാമ്പത്തികവര്‍ഷം ചൈനയ്ക്ക് പലിശയിനത്തില്‍ പാകിസ്താന്‍ അടച്ചുതീര്‍ത്തത് 2,610 കോടി രൂപയാണെന്ന് വിര്‍ജീനിയ കേന്ദ്രമായ അന്താരാഷ്ട്ര വികസന ഗവേഷണ ലാബായ എയ്ഡ് ഡാറ്റ പുറത്തുവിട്ട റിപ്പോര്‍ട്ടില്‍ പറയുന്നു.

കൊട്ടിഘോഷിക്കുന്ന ബെല്‍റ്റ് ആന്‍ഡ് റോഡ് പദ്ധതിയുടെ മറവില്‍ ദരിദ്ര രാജ്യങ്ങളെ ഒളിഞ്ഞിരിക്കുന്ന കടങ്ങളിലാഴ്ത്തി ചൈന വന്‍ നേട്ടം കൊയ്യുകയാണെന്ന് റിപ്പോര്‍ട്ട് വെളിപ്പെടുത്തുന്നു. അന്താരാഷ്ട്ര വികസന വിപണിയില്‍ ആധിപത്യം സ്ഥാപിക്കാന്‍ സഹായത്തേക്കാളേറെ കടമാണ് ചൈന ഉപയോഗിക്കുന്നത്. കടുത്ത സാമ്പത്തിക പ്രതിസന്ധിയിലുള്ള പാകിസ്താന് കനത്ത ആഘാതമാണ് ചൈനയില്‍ നിന്ന് വന്‍ തുക കടം വാങ്ങിയതു വഴി ഉണ്ടായത്.

വിദേശകടം അടച്ചുതീര്‍ക്കാനും വിദേശനാണ്യശേഖരം കുറയാതെ നിലനിര്‍ത്താനും പാകിസ്താന്‍ വന്‍തോതില്‍ ചൈനയുടെ ധനസഹായത്തെയാണ് വലിയ തോതില്‍ ആശ്രയിക്കുന്നത്. നേരത്തെ സഊദിക്കുള്ള 200 കോടി ഡോളര്‍ കടം പാകിസ്താന്‍ തിരിച്ചടച്ചതും ചൈനീസ് സഹായത്തോടെയായിരുന്നു. ചൈനയുടെ വായ്പയില്ലെങ്കില്‍ പാക് കരുതല്‍ ധനം ശൂന്യമായിരിക്കുമെന്നും റിപ്പോര്‍ട്ട് പറയുന്നു.