കണ്ണൂര്‍: ദേശീയ ഹരിത ട്രൈബ്യൂണല്‍ വിലയിരുത്തലിന്റെ അടിസ്ഥാനത്തില്‍ കേരളത്തിലെ പ്രധാന നഗരങ്ങളില്‍ കെ.എസ്.ആര്‍.ടി.സി ബസുകള്‍ മാര്‍ച്ച് 31ഓടെ പ്രകൃതിവാതകം (കംപ്രസ്ഡ് നാച്വറല്‍ ഗ്യാസ്-സി.എന്‍.ജി) ഉപയോഗിച്ചു സര്‍വിസ് നടത്തുമെന്നു ഗതാഗത മന്ത്രി എ.കെ ശശീന്ദ്രന്‍.
കണ്ണൂര്‍ ജില്ലാ ബസ് ഓപറേറ്റേഴ്‌സ് അസോസിയേഷന്‍ ജില്ലാ കണ്‍വന്‍ഷനും കുടുംബ സംഗമവും ഉദ്ഘാടനം ചെയ്യുകയായിരുന്നു അദ്ദേഹം.
ട്രൈബ്യൂണല്‍ വിധിയില്‍ താല്‍ക്കാലിക സ്റ്റേ മാത്രമാണ് സംസ്ഥാനത്തിനു ലഭിച്ചത്. പത്തു വര്‍ഷത്തിലധികമായ ഡീസല്‍ എന്‍ജിനുകള്‍ മാറ്റാന്‍ ഇപ്പോഴേ നാം ശ്രമം തുടരണം. ഇതിനായി അടുത്ത ആറുമാസത്തിനകം പ്രധാന നഗരങ്ങളില്‍ സി.എന്‍.ജി ഔട്ട്‌ലറ്റുകള്‍ സ്ഥാപിക്കുന്നതിനുള്ള ശ്രമം ആരംഭിച്ചിട്ടുണ്ട്.
പ്രധാന നഗരങ്ങളില്‍ സിറ്റി സര്‍വിസ് നടത്തുന്ന ബസുകളെങ്കിലും പ്രകൃതി വാതകത്തിലേക്കു മാറണം. സ്വകാര്യ ബസുകളും ഇത്തരത്തില്‍ മാറ്റംവരുത്തണം. നിലവില്‍ പത്തുവര്‍ഷത്തിലധികമായുള്ള ഡീസല്‍ ബസുകള്‍ 4,000 ത്തോളമാണു കേരളത്തിലുള്ളത്. അതിനാല്‍ ഡീസലില്‍ നിന്ന് സി.എന്‍.ജിയിലേക്കു മാറുന്നതിനു വലിയ ബുദ്ധിമുട്ടുണ്ടാവില്ല.
സി.എന്‍.ജി ഉപയോഗിക്കുമ്പോള്‍ ബസുകള്‍ക്ക് ഇന്ധനചെലവില്‍ 60 ശതമാനം ലാഭമുണ്ടാക്കാനാകുമെന്നും അദ്ദേഹം പറഞ്ഞു.