റിയാദ്: ഇന്ത്യ-സഊദി വിമാന സർവ്വീസുമായി ബന്ധപ്പെട്ട് ഇന്ത്യൻ സംഘം സഊദി എയർലൈൻസ് മേധാവിയുമായി ചർച്ച നടത്തി. സഊദിയിലെ ഇന്ത്യൻ അംബാസിഡർ ഡോ: ഔസാഫ് സഈദ്, ജിദ്ദയിലെ ഇന്ത്യൻ കോൺസുൽ ജനറൽ ഷാഹിദ് ആലം എന്നിവരാണ് സഊദി എയർലൈൻസ് മേധാവി ഇബ്രാഹീം അൽ ഉമറുമായി ആസ്ഥാനത്ത് ഔദ്യോഗിക കൂടിക്കാഴ്ച നടത്തിയത്. കൂടിക്കാഴ്ചയിൽ ഇന്ത്യയിൽ നിന്ന് സഊദിയിലെക്കുള്ള വിമാന സർവ്വീസ് പുനഃരാരംഭമാണ് ചർച്ചയായത്.

വളരെ നേരത്തെ തന്നെ സർവ്വീസുകൾ പുനഃരാരംഭിക്കുന്നതിനുള്ള നടപടികൾ കൈകൊള്ളണമെന്ന് അംബാസിഡർ ആവശ്യപ്പെട്ടിട്ടുണ്ട്. വിമാന സർവ്വീസുകൾ നേരത്തെ പുനരാരംഭിക്കേണ്ടതിന്റെ ആവശ്യകത അംബാസഡർ കൂടിക്കാഴ്ചയിൽ ഊന്നിപ്പറഞ്ഞു. ഇന്ത്യയിലെ ഉയർന്ന വാക്സിനേഷൻ, നിലവിൽ കൊവിഡ് കേസുകളിലെ കുറവ് എന്നിവ ഇരുവരും സഊദിയയുമായി പങ്ക് വെച്ചിട്ടുണ്ട്.