കൊച്ചി
സംസ്ഥാനത്ത് 175 പുതിയ മദ്യവിൽപനശാലകൾ കൂടി ആരംഭിക്കുന്നത് പരിഗണനയിലാണെന്ന് സർക്കാർ ഹൈക്കോടതിയിൽ. ഇതു സംബന്ധിച്ച ബെവ്കോയുടെ ശുപാർശ എക്സൈസ് വകുപ്പിന്റെ പരിഗണനയിലെന്നും സർക്കാർ അറിയിച്ചു.
1.12 ലക്ഷം ആളുകൾക്ക് ഒരു മദ്യവിൽപനശാല എന്ന തരത്തിലാണ് കേരളത്തിലെ അനുപാതം. ഈ സാഹചര്യത്തിൽ കൂടുതൽ മെച്ചപ്പെട്ട സേവനങ്ങൾ നൽകാൻ മദ്യശാലകളുടെ എണ്ണം വർധപ്പിക്കേണ്ടതുണ്ടെന്നാണ് സർക്കാരിന്റെ ന്യായീകരണം. വാക്ക് ഇൻ മദ്യവിൽപനശാലകൾ തുടങ്ങണമെന്ന കോടതിയുടെ നിർദേശം സജീവ പരിഗണനയിലാണ്.
ബിവറേജസ് കോർപറേഷനു കീഴിലുള്ള 96 മദ്യവിൽപനശാലകളിൽ നിലവിൽ വാക്ക് ഇൻ സൗകര്യമുണ്ടെന്നും സർക്കാർ വ്യക്തമാക്കി.
പരിസരവാസികൾക്ക് ബുദ്ധിമുട്ടുണ്ടാകാത്ത തരത്തിലായിരിക്കണം മദ്യശാലകളുടെ പ്രവർത്തനമെന്ന് ഹൈക്കോടതി നിർദേശിച്ചു. മദ്യശാലകൾക്കു മുന്നി ലുള്ള ജനബാഹുല്യം തടണമെന്ന ഉത്തരവ് നാലു വർഷങ്ങൾക്കു മുമ്പുള്ളതാണെന്ന് കോടതി സർക്കാരിനെ ഓർമിപ്പിച്ചു.
മദ്യശാലകളുടെ സമീപത്തെ പരിസരവാസികൾക്ക് ഏതെങ്കിലും തരത്തിലുള്ള ശല്യങ്ങളുണ്ടോ എന്നു നിരീക്ഷിക്കേണ്ടതാണ്. മദ്യശാലകൾക്ക് സമീപത്തു താമസിക്കുന്നവർക്ക് ഏതെങ്കിലും തരത്തിലുള്ള പീഡന പരാതികളോ ശല്യം സംബന്ധിച്ച പരാതികളോ ഉണ്ടോ എന്നു പരിശോധിക്കണം.
കോടതിക്ക് ലഭിച്ചിട്ടുള്ള പരാതികൾ മദ്യശാലകളിലെ ക്യൂ മൂലമുണ്ടാകുന്ന പരാതികളാണെന്നു ജസ്റ്റിസ് ദേവൻ രാമചന്ദ്രൻ വ്യക്തമാക്കി. മദ്യശാലകൾക്ക് പഞ്ചനക്ഷത്ര സൗകര്യമുണ്ടാകണമെന്ന അഭിപ്രായമല്ല ഉള്ളത്. മദ്യപിക്കാത്തവർക്ക് ക്യൂ നിൽക്കുന്നവരിൽനിന്ന് യാതൊരു വിധ ശല്യങ്ങളോ പീഡനങ്ങളോ ഉണ്ടാവാൻ പാടില്ല.
എല്ലാ മദ്യശാലകൾക്കും സമീപം താമസിക്കുന്ന സ്ത്രീകൾക്കും കുട്ടികൾക്കും മദ്യശാലകൾകൊണ്ടു കടുത്ത വിഷമങ്ങളാണുള്ളതെന്ന തുറന്ന രഹസ്യം പറയാതിരിക്കാനാവില്ല. കോടതിയുടെ ഇടപെടൽ കൊണ്ടു നേരിയ തോതിലുള്ള മാറ്റങ്ങളുണ്ടെങ്കിലും നിലവിലുള്ള സാഹചര്യം അനുകൂലമല്ല. കുടുതൽ സൗകര്യങ്ങൾ ഇനിയുമൊരുക്കുന്നതുവരെ ബെവ്കോയ്ക്കും മറ്റുമെതിരേയുള്ള കോടതിയലക്ഷ്യ നടപടികൾ തീർപ്പാക്കുന്നില്ലെന്നും കോടതി വ്യക്തമാക്കി. ഹരജികൾ നവംബർ 23നു പരിഗണിക്കാൻ മാറ്റി.