സ്വന്തം ലേഖകൻ
തിരുവനന്തപുരം
സംസ്ഥാനത്തെ കഴിഞ്ഞ നിയമസഭാ തെരഞ്ഞെടുപ്പിൽ പാർട്ടികളിലേക്ക് ഒഴുകിയതും പാർട്ടികൾ ഒഴുക്കിയതുമായ പണത്തിന്റെ കണക്കുകൾ പുറത്ത്. ഏറ്റവും കൂടുതൽ സംഭാവന ലഭിച്ചത് സി.പി.എമ്മിനാണെന്ന് തെരഞ്ഞെടുപ്പ് കമ്മിഷന് പാർട്ടികൾ നൽകിയ കണക്കുകൾ വ്യക്തമാക്കുന്നു. ആകെ 58.86 കോടി രൂപയാണ് സി.പി.എമ്മിന് ലഭിച്ചത്. കോൺഗ്രസിന് 36.96 കോടി സംഭാവനയായി ലഭിച്ചപ്പോൾ ബി.ജെ.പിക്ക് 8.65 കോടിയാണ് ലഭിച്ചത്.സി.പി.ഐക്ക് 5.13 കോടിയും കേരള കോൺഗ്രസി(എം)ന് 63.22 ലക്ഷവും ലഭിച്ചു.

സി.പി.എം പരസ്യത്തിന് 17 കോടിയാണ് ചെലവഴിച്ചത്. കോൺഗ്രസ് 16 കോടിയും ബി.ജെ.പി 7.92 കോടിയും ചെലവഴിച്ചു. സ്ഥാനാർഥികൾക്ക് സി.പി.എം 4.21 കോടിയും കോൺഗ്രസ് 11.56 കോടിയും ബി.ജെ.പി 9.18 കോടിയും നൽകി. സി.പി.എമ്മിൽ ഏറ്റവും കൂടുതൽ സ്ഥാനാർഥി വിഹിതം ലഭിച്ചത് പി.എ മുഹമ്മദ് റിയാസിനാണ്, 22 ലക്ഷം. കെ.കെ രാമചന്ദ്രന് 22 ലക്ഷവും ആർ.ബിന്ദുവിന് 20 ലക്ഷവും ലഭിച്ചു. കോൺഗ്രസിൽ ഷാഫി പറമ്പിലിനാണ് ഏറ്റവും കൂടുതൽ സ്ഥാനാർഥിവിഹിതം ലഭിച്ചത്, 23 ലക്ഷം. ബി.ജെ.പി അധ്യക്ഷൻ കെ. സുരേന്ദ്രന് കോന്നിയിലേക്ക് 40 ലക്ഷവും മഞ്ചേശ്വരത്തേക്ക് 15 ലക്ഷവും ലഭിച്ചു. എ ക്ലാസ് മണ്ഡലങ്ങളിലെ സ്ഥാനാർഥികൾക്ക് 15 ലക്ഷം വീതമാണ് ബി.ജെ.പി നൽകിയത്. വിമാനയാത്രയ്ക്കും ഹെലികോപ്റ്റർ യാത്രയ്ക്കും ബി.ജെ.പി 2.45 കോടി ചെലവഴിച്ചു. പ്രധാനമന്ത്രി നരേന്ദ്രമോദിയുടെ യാത്രയ്ക്ക് 43 ലക്ഷവും യോഗി ആദിത്യനാഥിൻ്റെ യാത്രയ്ക്ക് 25 ലക്ഷവും ചെലവായി. രാഹുൽ ഗാന്ധിയുടെയും പ്രിയങ്കാ ഗാന്ധിയുടെയും യാത്രയ്ക്കായി 1.57 കോടി ചെലവായി.