കരുവാരക്കുണ്ട്: കല്‍ക്കുണ്ട് ചേരിയില്‍ സ്റ്റോറൂമും പുകപ്പുരയും കത്തിനശിച്ചു. തീ അണയ്ക്കുന്നതിനിടെ ഉടമയ്ക്കു പൊളളലേറ്റു. ഇന്നലെ ഉച്ചയ്ക്കു ശേഷം മൂന്നിനാണ് അല്‍ഫോന്‍സ് പളളിക്ക് സമീപം താമസിക്കുന്ന പന്തക്കല്‍ ജോര്‍ജിന്റെ റാട്ടപ്പുരയ്ക്കും സ്റ്റോര്‍ റൂമിനും തീപിടിച്ചത്.
പുകപ്പുരയില്‍ ഉണക്കാനിട്ടിരുന്ന റബ്ബര്‍ ഷീറ്റുകളില്‍ തീ പിടിച്ചതാണു അപകടകാരണം. തുടര്‍ന്നു സ്‌റ്റോറൂമിലേക്കും തീ പടരുകയായിരുന്നു. തീ പടര്‍ന്നതോടെ ജോര്‍ജിന്റെ വീട്ടിലെ കുഴല്‍ക്കിണറില്‍ നിന്നും വെള്ളം പമ്പ് ചെയ്തതോടെയാണു വന്‍ ദുരന്തം ഒഴിവായത്. സ്റ്റോര്‍ റൂമിന്റെ സമീപത്താണു ജോര്‍ജിന്റെ വീട്.
തീ അണയ്ക്കുന്നതിനിടെ ജോര്‍ജിനാണു പൊള്ളറ്റേത്. കൈക്കും വയറിനും പൊളളലേറ്റു.  വിവരമറിഞ്ഞു ഫയര്‍ഫോഴ്‌സും പൊലിസും സ്ഥലത്തെത്തിയെങ്കിലും നാട്ടുകാര്‍ തീ അണച്ചിരുന്നു.
ആറ് കിന്റല്‍ റബ്ബര്‍ഷീറ്റുകളും നാല് കിന്റല്‍ ഉണക്കിയ കുരുമുളകും 25 കിലോ ജാതി, 50 കിലോ കൊട്ടടക്ക, വീട്ടാവശ്യത്തിനു സൂക്ഷിച്ചിരുന്ന വസ്തുക്കളും പൂര്‍ണമായും കത്തിനശിച്ചു .എകദേശം 10 ലക്ഷം രൂപയുടെ നാശനഷ്ടം സംഭവിച്ചിട്ടുണ്ട്.