തിരുവനന്തപുരം: തിരുവനന്തപുരത്ത് യുവാവിന് മര്‍ദ്ദനം. തിരുവനന്തപുരം കണിയാപുരത്ത് പുത്തന്‍തോപ്പ് സ്വദേശി അനസാണ് മര്‍ദ്ദനത്തിനിരയായത്. മദ്യപിച്ചെത്തിയ ഒരു സംഘം ആളുകളാണ് മര്‍ദ്ദിച്ചതെന്ന് അനസ് പറയുന്നു. ഭക്ഷണം വാങ്ങിക്കാന്‍ പോയതായിരുന്നു. കൂടെയുള്ളയാളേയും അടിച്ചു. എന്താണ് കാര്യമെന്നറിയില്ല. അയാളെ ആദ്യമായാണ് കാണുന്നതെന്നും യുവാവ് പറയുന്നു.
ഭക്ഷണം കഴിക്കാന്‍ പോകുന്ന വഴി വാഹനം തടഞ്ഞു നിര്‍ത്തി താക്കോല്‍ ഊരിയെടുത്തു. അത് ചോദ്യം ചെയ്തതിന് പിന്നാലെയാണ് മര്‍ദ്ദനം ആരംഭിച്ചത്. ബോധരഹിതനായ ശേഷവും ആക്രമണം തുടര്‍ന്നെന്നും അനസ് പറഞ്ഞു.

സംഭവത്തിന്റെ സിസിടിവി ദൃശ്യങ്ങള്‍ പുറത്തു വന്നിട്ടുണ്ട്. കണിയാപുരത്തുള്ള ഫൈസല്‍ എന്നയാളുടെ നേതൃത്വത്തിലുള്ള സംഘമാണ് മര്‍ദ്ദനം നടത്തിയതെന്നാണ് സൂചന. നേരത്തെയും നിരവധി കേസുകളില്‍ പ്രതിയാണ് ഫൈസല്‍. എന്നാല്‍ പൊലിസ് ഇതുവരെ കേസെടുത്തിട്ടില്ല. പൊലിസുകാര്‍ തമ്മിലുള്ള അതിര്‍ത്തി തര്‍ക്കത്തെ തുടര്‍ന്നാണ് കേസെടുക്കാത്തതെന്നാണ് വിവരം.