മഞ്ചേരി: വിദ്യാര്‍ഥികള്‍ക്ക് കഞ്ചാവ് എത്തിക്കുന്ന യുവാവിനെ മഞ്ചേരി എക്‌സൈസ് സംഘം പിടികൂടി. ഊര്‍ങ്ങാട്ടിരി കല്ലരട്ടിക്കല്‍ കാരിപറമ്പന്‍ വീട്ടില്‍ രാജന്റെ മകന്‍ സമജാ(37)ണു പിടിയിലായത്. ഇയാള്‍ മുമ്പും കഞ്ചാവു കേസില്‍ പ്രതിയായിട്ടുണ്ട്. അരീക്കോട് ടൗണിലും പരിസരങ്ങളിലെ ഹയര്‍സെക്കന്‍ഡറി സ്‌കൂളുകള്‍ കേന്ദ്രീകരിച്ചുമാണ് ഇയാള്‍ പ്രധാനമായും കഞ്ചാവ് വില്‍പന നടത്തുന്നത്. സ്‌കൂള്‍ വിദ്യാര്‍ഥികളില്‍ നിന്നും രക്ഷിതാക്കളില്‍ നിന്നുമുള്ള പരാതിയെത്തുടര്‍ന്ന് ഇയാള്‍ ആഴ്ചകളായി നിരീക്ഷണത്തിലായിരുന്നു. 350 രൂപ നിരക്കില്‍ വില്‍പനക്കായി തയ്യാറാക്കിയ 80 പാക്കറ്റ് കഞ്ചാവും ഇയാളില്‍ നിന്നു കണ്ടെത്തിയിട്ടുണ്ട്. വിദ്യാര്‍ഥികളാണ് പ്രധാന ഇരകളെന്ന് എക്‌സൈസ് ഇന്‍സ്‌പെക്ടര്‍ ഇ.ജിനീഷ് അറിയിച്ചു.