കൊച്ചി: പുരാവസ്തു തട്ടിപ്പു കേസില്‍ അന്വേഷണവുമായി ഇ.ഡിമുന്നോട്ട്. കേസിലെ പരാതിക്കാര്‍ക്ക് ഇഡി നോട്ടിസയച്ചു. രേഖകളുമായി മൊഴി നല്‍കാന്‍ ഹാജരാകണമെന്ന് നിര്‍ദ്ദേശിച്ചാണ് നോട്ടിസ് അയച്ചത്. പരാതിക്കാരനായ യാക്കൂബിനാണ് ഇ.ഡി നോട്ടിസയച്ചത്. അതേസമയം, ഇന്ന് ഹാജരാകാന്‍ കഴിയില്ലെന്ന് പരാതിക്കാരന്‍ അറിയിച്ചു. അതിനിടെ കേസില്‍ ഇഡി ആവശ്യപ്പെട്ട അന്വേഷണ വിവരങ്ങള്‍ ഒരു മാസം കഴിഞ്ഞിട്ടും ക്രൈംബ്രാഞ്ച് ഇതുവരെ കൈമാറിയിട്ടില്ല.

ഇ.ഡി ഇടപെടുന്നതിനെതിരെ സര്‍ക്കാര്‍ നിലപാട് എടുത്തിരുന്നു. വ്യാജ പുരാവസ്തുക്കളുടെ മറവില്‍ മോന്‍സണ്‍ മാവുങ്കല്‍ തട്ടിപ്പ് നടത്തിയെന്ന കേസില്‍ സി.ബി.ഐ.യെ കൊണ്ടുവരാന്‍ എന്‍ഫോഴ്‌സ്‌മെന്റ് ഡയറക്ടറേറ്റിന് (ഇ.ഡി.) അമിതാവേശമെന്ന് കഴിഞ്ഞ ദിവസം സര്‍ക്കാര്‍ ഹൈക്കോടതിയില്‍ കുറ്റപ്പെടുത്തിയിരുന്നു. ഹരജിയില്‍ ഉന്നയിക്കാത്ത വിഷയങ്ങള്‍ ഹൈക്കോടതി ചര്‍ച്ചയ്ക്കു വിധേയമാക്കുന്നത് അന്വേഷണത്തെ ബാധിക്കുമെന്ന വിമര്‍ശനവും സര്‍ക്കാര്‍ ഉന്നയിച്ചു.

മോന്‍സനുവേണ്ടി പൊലിസുകാര്‍ ഉപദ്രവിക്കുന്നതില്‍നിന്ന് സംരക്ഷണം തേടി മോന്‍സന്റെ മുന്‍ ഡ്രൈവര്‍ ഇ.വി. അജിത് നല്‍കിയ ഹര്‍ജിയിലെ തുടര്‍ നടപടികള്‍ അവസാനിപ്പിക്കണം എന്നാവശ്യപ്പെട്ട് ക്രൈംബ്രാഞ്ച് എ.ഡി.ജി.പി. എസ്. ശ്രീജിത് സമര്‍പ്പിച്ച സത്യവാങ്മൂലത്തിലാണ് ഇ.ഡി.യെയും പരോക്ഷമായി ഹൈക്കോടതിയെയും സര്‍ക്കാര്‍ വിമര്‍ശിച്ചത്.