കോഴിക്കോട്: കണ്ണങ്കണ്ടി ബില്‍ഡിങ്ങിനു സമീപത്തുവച്ച് ഒരുകിലോ കഞ്ചാവുമായി രണ്ട് യുവാക്കളെ കസബ പൊലിസ് പിടികൂടി. തലശ്ശേരി ചാലില്‍ പി.പി സഫീര്‍ (31), എ. ഷമീര്‍ (32) എന്നിവരാണ് പിടിയിലായത്. നഗരത്തിലെ ചെറുകിട വില്‍പനക്കാര്‍ക്കും ജില്ലയിലെ മറ്റു ഭാഗങ്ങളിലേക്കും കഞ്ചാവ് തലശ്ശേരി ഭാഗങ്ങളില്‍ നിന്ന് വന്‍തോതില്‍ എത്തിക്കുന്നുണ്ടെന്ന വിവരത്തിന്റെ അടിസ്ഥാനത്തില്‍ സൗത്ത് അസിസ്റ്റന്റ് കമ്മിഷണര്‍ അബ്ദുല്‍ റസാഖിന്റെ നിര്‍ദേശത്തെ തുടര്‍ന്ന് നടക്കാവ് സി.ഐയുടെ നേതൃത്വത്തിലുള്ള ഷാഡോ പൊലിസ് നടത്തിയ അന്വേഷണത്തിലാണ് ഇവരെക്കുറിച്ച് വിവരം ലഭിച്ചത്.
തുടര്‍ന്നു കസബ പൊലിസിന്റെ സഹായത്തോടെ ഇവരെ അറസ്റ്റ് ചെയ്യുകയായിരുന്നു. അറസ്റ്റിലായവര്‍ തലശ്ശേരി ഭാഗങ്ങളിലെ മയക്കുമരുന്ന് ശൃംഖലയിലെ പ്രധാനികളാണ്. അന്വേഷണ സംഘത്തില്‍ കസബ എസ്.ഐ സജി, ഷാഡോ പൊലിസ് അംഗങ്ങളായ വിഷ്ണുകുമാര്‍, രഞ്ജിത്ത്, സുനില്‍കുമാര്‍, സുധര്‍മന്‍, രഞ്ജിത്ത് ചന്ദ്രന്‍ എന്നിവരുമുണ്ടായിരുന്നു.