ന്യൂഡൽഹി
അടുത്ത മൂന്ന് വർഷം കൊണ്ട് രാജ്യത്തെ 25 വിമാനത്താവളങ്ങൾ കൂടി സ്വകാര്യവൽക്കരിക്കാൻ തീരുമാനം. എയർപോർട്ട് അതോറിറ്റി ഓഫ് ഇന്ത്യയുടെ കീഴിലുള്ള വിമാനത്താവളങ്ങളാണ് സ്വകാര്യവൽക്കരിക്കുന്നത്. കോഴിക്കോട് വിമാനത്താവളവും ഇതിലുൾപ്പെടും. കേന്ദ്രസർക്കാരിൻ്റെ ആസ്തി വിറ്റഴിക്കൽ പദ്ധതി (നാഷനൽ മോണിറ്റൈസേഷൻ പൈപ്പ് ലൈൻ)യിലുൾപ്പെടുത്തി 2022 മുതൽ 2015 വരെയുള്ള കാലയളവിലാണ് വിമാനത്താവളങ്ങൾ സ്വകാര്യവൽക്കരിക്കുകയെന്ന് വ്യോമയാന സഹമന്ത്രി വി.കെ സിങ് ലോക്സഭയിലറിയിച്ചു.
കോഴിക്കോടിന് പുറമെ ഭുവനേശ്വർ, വാരണാസി, അമൃത് സർ, തിരുച്ചിറപ്പള്ളി, ഇൻഡോർ, റായ്പൂർ, കോയമ്പത്തൂർ, നാഗ്പൂർ, പട്ന, മധുര, സൂറത്ത്, റാഞ്ചി, ജോധ്പൂർ, ചെന്നൈ, വിജയവാഡ, വഡോദര, ഭോപ്പാൽ, തിരുപ്പതി, ഹൂബ്ലി, ഇംഫാൽ, അഗർത്തല, ഉദയ്പൂർ, ഡെറാഡൂൺ, രാജമുണ്ട്രി എന്നീ വിമാനത്താവളങ്ങളും സ്വകാര്യവൽക്കരിക്കും.
2019-20 സാമ്പത്തിക വർഷത്തിൽ നാലു ലക്ഷത്തിലേറെ പേർ യാത്ര ചെയ്ത വിമാനത്താവളങ്ങളാണ് സ്വകാര്യവൽക്കരണത്തിനായി പരിഗണിച്ചത്. തിരുച്ചിറപ്പള്ളി ഉൾപ്പെടെ 13 വിമാനത്താവളങ്ങൾ പൊതു-സ്വകാര്യ പങ്കാളിത്തത്തിലാകും പ്രവർത്തിക്കുക. പദ്ധതി നടപ്പിൽവന്നാലും എയർപോർട്ട് അതോറിറ്റി ഓഫ് ഇന്ത്യക്ക് തന്നെയാകും ഈ വിമാനത്താവളങ്ങളുടെ ഉടമസ്ഥത. അഹമ്മദാബാദ്, ജെയ്പൂർ, ലഖ്നൗ, ഗുവാഹത്തി, തിരുവനന്തപുരം, മംഗളൂരു എന്നീ ആറ് വിമാനത്താവളങ്ങൾ നിലവിൽ പൊതു-സ്വകാര്യ പങ്കാളിത്തത്തിലാണ് പ്രവർത്തിക്കുന്നത്.