ബംഗളൂരു: കര്‍ണാടകയില്‍ ക്രിസ്ത്യന്‍ വൈദികനു നേരെ ആക്രമണ ശ്രമം. വടക്കന്‍ കര്‍ണാടകയിലെ ബെളഗാവിയില്‍ വടിവാളുമായി എത്തിയ ആക്രമിയില്‍നിന്ന് വൈദികന്‍ രക്ഷപ്പെട്ടത് തലനാരിഴക്കാണ്.

പള്ളിയുടെ പിന്നില്‍ വൈദികന്‍ താമസിക്കുന്ന വീടിന്റെ മതില്‍ ചാടിക്കടന്ന് അക്രമി ഒന്നാം നിലയില്‍ ഒളിച്ചിരിക്കുന്നതും ബഹളം കേട്ട് പ്രദേശവാസികള്‍ ഓടിയെത്തുമ്പോള്‍ മതില്‍ ചാടി രക്ഷപ്പെടുന്നതും സിസി ടിവിയില്‍ പതിഞ്ഞിട്ടുണ്ട്. ഊരിപ്പിടിച്ച വാള്‍ കൃത്യമായി പതിഞ്ഞിട്ടുണ്ട് ദൃശ്യത്തില്‍.

സംഭവത്തില്‍ അന്വേഷണം നടക്കുന്നതായി പൊലിസ് പറഞ്ഞു. അക്രമിയെ തിരിച്ചറിഞ്ഞിട്ടുണ്ടെന്നും എന്നാല്‍ ഇയാള്‍ക്ക് മാനസിക പ്രശ്‌നങ്ങള്‍ ഉള്ളതായാണ് കരുതുന്നതെന്നും പൊലീസ് കമീഷണര്‍ കെ ത്യാഗരാജന്‍ പറഞ്ഞു. പ്രാഥമിക വിവരമനുസരിച്ച് ആക്രമണത്തിന് രാഷ്ട്രീയ ബന്ധമൊന്നുമില്ലെന്നും അദ്ദേഹം പറഞ്ഞു.

കഴിഞ്ഞ 2 മാസത്തിനിടെ ബെളഗാവിയില്‍ ക്രിസ്ത്യന്‍ ദേവാലയങ്ങള്‍ക്കു നേരെ ഒട്ടേറെ അക്രമങ്ങള്‍ നടന്നിരുന്നു.
നവംബറില്‍ ബെളഗാവിയില്‍ മതപരിവര്‍ത്തനം ആരോപിച്ച് ഹിന്ദുത്വ സംഘടന പ്രവര്‍ത്തകര്‍ പ്രാര്‍ഥനായോഗം തടസ്സപ്പെടുത്തിയിരുന്നു.

മതപരിവര്‍ത്തന നിരോധന നിയമം നടപ്പാക്കാനുള്ള നീക്കത്തിനുശേഷം സംസ്ഥാനത്ത് ക്രിസ്ത്യന്‍ വിഭാഗത്തിനുനേരെയുള്ള ആക്രമണം വര്‍ധിച്ചുവെന്ന കണക്കുകള്‍ പൗരാവകാശ സംഘടനകള്‍ പുറത്തുവിട്ടതിന് പിന്നാലെയാണ് ഇപ്പോള്‍ ബെളഗാവിയില്‍ വൈദികനുനേരെ ആക്രമണശ്രമം നടന്നത്.

12 മാസത്തിനിടെ 38 ആക്രമണങ്ങള്‍ റിപ്പോര്‍ട്ട് ചെയ്തിട്ടുണ്ട്. തിങ്കളാഴ്ച ബെളഗാവിയില്‍ നടക്കുന്ന നിയമസഭ ശീതകാല സമ്മേളനത്തില്‍ മതപരിവര്‍ത്തന നിരോധന ബില്‍ അവതരിപ്പിക്കാനാണ് സര്‍ക്കാര്‍ നീക്കം. അതേസമയം, നിര്‍ബന്ധിത മതപരിവര്‍ത്തനം തടയാന്‍ ഉദേശിച്ചുള്ള ബില്‍ ക്രിസ്ത്യാനികളെ ലക്ഷ്യമിട്ടല്ലെന്നു കര്‍ണാടക മുഖ്യമന്ത്രി ബസവരാജ് ബൊമ്മെ പറഞ്ഞു. സര്‍ക്കാര്‍ നീക്കത്തെ നിയമസഭയില്‍ എതിര്‍ക്കുമെന്നു കോണ്‍ഗ്രസ് വ്യക്തമാക്കിയിട്ടുണ്ട്.