കോട്ടയം: തലയാഴത്ത് പൂച്ചയെ എയര്‍ഗണ്‍ ഉപയോഗിച്ച് വെടിവച്ചതായി പരാതി. തലയാഴം പരണാത്ര വീട്ടില്‍ രാജന്‍ സുജാത ദമ്പതികളുടെ എട്ടുമാസം പ്രായമുള്ള വളര്‍ത്തുപൂച്ചയെയാണ് അയല്‍വാസിയായ രമേശന്‍ എയര്‍ഗണ്‍ ഉപയോഗിച്ച് വെടിവച്ച് കൊലപ്പെടുത്താന്‍ ശ്രമിച്ചത്.

രമേശന്റെ വളര്‍ത്തുപ്രാവിനെ കഴിഞ്ഞ ദിവസം ചിറകൊടിഞ്ഞ നിലയില്‍ കണ്ടെത്തിയിരുന്നു. ഇത് പൂച്ച കടിച്ചതിനെ തുടര്‍ന്നാണെന്ന് ആരോപിച്ചായിരുന്നു അക്രമണം.

ഇന്നലെയാണ് പൂച്ചയെ പരുക്കേറ്റ നിലയില്‍ കണ്ടെത്തിയത്. റോഡരികില്‍ അവശയായി ഇരിക്കുന്നത് കണ്ട പൂച്ചയെ രാജന്റെ മകള്‍ പരിശോധിച്ചപ്പോഴാണ് ശരീരത്തില്‍ നിന്നും രക്തം വാര്‍ന്നുപോകുന്നത് ശ്രദ്ധയില്‍പ്പെട്ടത്. ശരീരത്തില്‍ പെല്ലറ്റ് കുടുങ്ങിയ പൂച്ചയെ ആദ്യം വൈക്കത്തുള്ള മൃഗാശുപത്രിയില്‍ എത്തിച്ചെങ്കിലും വിദഗ്ധ ചികിത്സായ്ക്കായി കോട്ടയം മൃഗാശുപത്രിയിലേക്ക് മാറ്റി.  ഇത്തരം നടപടികള്‍ തുടരാതിരിക്കാന്‍ നിയമ സഹായം തേടാനൊരുങ്ങുകയാണ് പൂച്ചയെ വളര്‍ത്തുന്ന രാജനും സുജാതയും.