ആലപ്പുഴ: ബി.ജെ.പി,എസ്.ഡി.പി.ഐ നേതാക്കളുടെ കൊലപാതകവുമായി ബന്ധപ്പെട്ട് 50 പേരെ പൊലിസ് കസ്റ്റഡിയിലെടുത്തതായി ഐ.ജി ഹര്‍ഷിത അട്ടല്ലൂര്‍ വ്യക്തമാക്കി. ഇവരുടെ അറസ്റ്റ് ഉടന്‍ രേഖപ്പെടുത്തും. കസ്റ്റഡിയില്‍ എടുത്തവരില്‍ ആര്‍.എസ്.എസ്,എസ്.ഡി.പി.ഐ പ്രവര്‍ത്തകരുണ്ട്.

ഇനി ഇതുപോലുള്ള അതിക്രമങ്ങള്‍ നടന്നാല്‍ കര്‍ശന നടപടിയെടുക്കുമെന്ന് ഐ.ജി കൂട്ടിച്ചേര്‍ത്തു.'കേസുമായി ബന്ധപ്പെട്ട് അന്വേഷണം പുരോഗമിക്കുകയാണ്. ഇരു കൊലപാതകങ്ങളുമായി ബന്ധമുണ്ടോ എന്നത് അന്വേഷിക്കുകയാണ്. പ്രത്യേക സംഘമാണ് കേസ് അന്വേഷണം നടത്തുന്നത്. ക്രമസമാധാന ചുമതല നോക്കുന്നത് മറ്റൊരു സംഘം ആണ്'- ഹര്‍ഷിത അട്ടല്ലൂരി വ്യക്തമാക്കി. ബാക്കി കാര്യങ്ങള്‍ പിന്നീട് അറിയിക്കാമെന്നും ഐജി പറഞ്ഞു.

ഇന്നലെ രാത്രിയാണ് എസ്ഡിപിഐ നേതാവ് കൊല്ലപ്പെട്ടത്. ആലപ്പുഴ മണ്ണഞ്ചേരിയിലാണ് സംഭവം. ബൈക്കില്‍ സഞ്ചരിക്കുകയായിരുന്ന ഷാനിനെ വാഹനമുപയോഗിച്ച് ഇടിച്ച് വീഴ്ത്തിയ ശേഷമാണ് വെട്ടിയത്. ഷാനെ കൊച്ചിയിലെ ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാന്‍ സാധിച്ചില്ല.