വടക്കാഞ്ചേരി: അകമല ബ്ലോക്ക് പഞ്ചായത്ത് ഓഫിസിന് സമീപമുള്ള പൊന്തക്കാട്ടില്‍ കലമാനിനെ (മ്ലാവ്) അവശനിലയില്‍ കണ്ടെത്തി. ശരീരമാസകലം മുറിവേറ്റിട്ടുള്ള മാനിന്റെ ഒരു കൊമ്പും, കാലിലെ കുളമ്പും നഷ്ടപ്പെട്ട നിലയിലാണ്.
ഒരു കണ്ണിന് കാഴ്ചശക്തിയും ഇല്ല. ഏകദേശം 15 വയസ് പ്രായമുള്ള മാനിന് വാര്‍ധക്യ സഹജമായ അസുഖങ്ങള്‍ മൂലമാണ് അവശത ഉണ്ടായിട്ടുള്ളതെന്നാണ് വനം വകുപ്പ് അധികൃതര്‍ പറയുന്നത്.
അവശത പരിഹരിക്കാന്‍ മുള്ളൂര്‍ക്കരയില്‍ നിന്നെത്തിയ വെറ്ററിനറി ഡോക്ടര്‍ ആന്റി ബയോട്ടിക് മരുന്നുകളും ഗ്ലൂക്കോസും നല്‍കി. ബ്ലോക്ക് ഓഫിസിന് സമീപത്തെ ആളൊഴിഞ്ഞ പറമ്പില്‍ കെട്ടിയിട്ടാണ് ചികിത്സ നല്‍കുന്നത്. വനപാലകരുടെ കാവലും ഏര്‍പ്പെടുത്തിയിട്ടുണ്ട്. മ്ലാവ് രണ്ട് ദിവസമായി ഭക്ഷണം കഴിച്ചിട്ടെന്നാണ് ഡോക്ടര്‍മാര്‍ പറയുന്നത്. തൊണ്ടയില്‍ നീരു കെട്ടിയിട്ടുണ്ടെന്നും ആരോഗ്യം മെച്ചപ്പെട്ടാല്‍ വനത്തില്‍ തുറന്ന് വിടുമെന്നും വനപാലകര്‍ അറിയിച്ചു.