തെരഞ്ഞെടുപ്പ് കമ്മിഷൻ ആരോഗ്യ സെക്രട്ടറിയുമായി കൂടിക്കാഴ്ച നടത്തി
ന്യൂഡൽഹി
അഞ്ചു സംസ്ഥാനങ്ങളിലെ നിയമസഭാ തെരഞ്ഞെടുപ്പുകൾ നീട്ടിവയ്ക്കില്ലെന്ന് സൂചന. ഒമിക്രോൺ വ്യാപനത്തിന്റെ പശ്ചാത്തലത്തിൽ തെരഞ്ഞെടുപ്പുകൾ നീട്ടണമെന്ന ആവശ്യത്തിൽ കേന്ദ്ര തെരഞ്ഞെടുപ്പ് കമ്മിഷൻ കേന്ദ്ര ആരോഗ്യ സെക്രട്ടറി രാജേഷ് ഭൂഷണുമായി നടത്തിയ ചർച്ചയിൽ തെരഞ്ഞെടുപ്പ് നടപടികൾ തുടരാമെന്ന നിലപാടിലെത്തിയെന്നാണ് വിവരം. സാഹചര്യങ്ങൾ നേരിട്ട് വിലയിരുത്താൻ ഇന്ന് ഉത്തർപ്രദേശിലേക്ക് പോകുമെന്ന് തെരഞ്ഞെടുപ്പ് കമ്മിഷൻ ഉദ്യോഗസ്ഥർ അറിയിച്ചു. മൂന്ന് ദിവസം കമ്മിഷൻ അംഗങ്ങൾ ലഖ്‌നൗവിലുണ്ടാകും.
തെരഞ്ഞെടുപ്പുകൾ നീട്ടേണ്ടതില്ലെന്നും ശക്തമായ നിയന്ത്രണങ്ങളോടെ തെരഞ്ഞെടുപ്പ് ആകാമെന്നുമുള്ള നിലപാടാണ് കമ്മിഷൻ സ്വീകരിച്ചിരിക്കുന്നതെന്നാണ് അറിവ്. ഉത്തർപ്രദേശ്, പഞ്ചാബ്, ഗോവ, ഉത്തരാഖണ്ഡ്, മണിപ്പൂർ സംസ്ഥാനങ്ങളിലെ നിയമസഭാ തെരഞ്ഞെടുപ്പുകളാണ് നടക്കാനുള്ളത്. ഗോവ നിയമസഭയുടെ കാലാവധി മാർച്ച് 15നും മണിപ്പൂരിലേത് മാർച്ച് 19നും അവസാനിക്കും. മെയ് 14നാണ് യു.പി നിയമസഭയുടെ കാലാവധി അവസാനിക്കുന്നത്. ഈ സംസ്ഥാനങ്ങളിൽ തെരഞ്ഞെടുപ്പ് കാലത്ത് ഏർപ്പെടുത്തേണ്ട നിയന്ത്രണങ്ങൾ, വാക്‌സിനേഷൻ നില തുടങ്ങിയവ സംബന്ധിച്ചും തെരഞ്ഞെടുപ്പ് കമ്മിഷൻ ആരോഗ്യ സെക്രട്ടറിയുമായി ചർച്ച നടത്തി. അലഹബാദ് ഹൈക്കോടതിയാണ് തെരഞ്ഞെടുപ്പ് നീട്ടിവയ്ക്കുന്നത് പരിശോധിക്കാൻ കമ്മിഷനോട് ആവശ്യപ്പെട്ടത്.