തിരൂർ (മലപ്പുറം)
നാടിന് ആവശ്യമായ പദ്ധതികളുമായാണ് സർക്കാർ മുന്നോട്ടു പോകുന്നതെന്നും അതൊന്നും ഉപേക്ഷിക്കാൻ തയാറല്ലെന്നും മുഖ്യമന്ത്രി പിണറായി വിജയൻ. സി.പി.എം ജില്ലാ സമ്മേളനം തിരൂരിൽ ഉദ്ഘാടനം ചെയ്യുകയായിരുന്നു അദ്ദേഹം.
കെ-റെയിൽ ഉൾപ്പെടെയുള്ള വികസനത്തിനെതിരേ ചിലർ നിലപാട് സ്വീകരിക്കുന്നുണ്ട്. അവരുടെ സമ്മർദത്തിനു വഴങ്ങി പദ്ധതികൾ ഉപേക്ഷിക്കാനാകില്ല. ഇപ്പോഴുള്ളിടത്ത് നിൽക്കലല്ല വികസനം.
നാം കൂടുതൽ മുന്നേറണം. അതുവഴി ഓരോ ആളുകളുടെയും ജീവിതനിലവാരത്തിൽ മാറ്റമുണ്ടാകും. അതിനാണ് വികസനം. അത്തരം സമീപനമാണ് സർക്കാർ സ്വീകരിക്കുന്നത്. ഇക്കാര്യത്തിൽ കൂടുതൽ ജനപിന്തുണ ആവശ്യമാണ്.
ദേശീയപാത വികസനത്തിന്റെ പേരിലും പ്രതിഷേധം നടന്നു. ഭൂമി വിട്ടുകൊടുക്കുന്നവരായിരുന്നില്ല സമരം ചെയ്തത്. നാടിന്റെ വികസനത്തിന് ചില നടപടികൾ ആവശ്യമാണ്. അതിന്റെ പേരിൽ ജനങ്ങൾ ബുദ്ധിമുട്ട് അനുഭവിക്കുന്നുണ്ടെങ്കിൽ അവരെ സഹായിക്കാൻ എന്തെല്ലാം ചെയ്യാൻ കഴിയുമെന്നാണ് സർക്കാർ ആലോചിക്കുന്നതെന്നും മുഖ്യമന്ത്രി പറഞ്ഞു.
മുസ് ലിം ലീഗിനെയും മുഖ്യമന്ത്രി കടന്നാക്രമിച്ചു. വർഗീയ സംഘടനകളുടെ ആശയം ലീഗ് ഏറ്റെടുക്കുകയാണെന്ന് മുഖ്യമന്ത്രി ആരോപിച്ചു. മുമ്പും വർഗീയ സംഘടനകളുമായി ലീഗ് യോജിച്ചു പ്രവർത്തിച്ചിട്ടുണ്ട്. എന്നാൽ, ഭൂരിഭാഗം ലീഗുകാരും സമാധാനം ആഗ്രഹിക്കുന്നവരാണെന്നും അവർ ഇതിനെതിരേ രംഗത്തുവരണമെന്നും മുഖ്യമന്ത്രി പറഞ്ഞു.
ജമാഅത്തെ ഇസ്‌ലാമിയുമായും പോപ്പുലർ ഫ്രണ്ടുമായും ലീഗ് നേരത്തെ ധാരണയുണ്ടാക്കിയിരുന്നു. ഇപ്പോൾ അവരുടെ മുദ്രാവാക്യം ലീഗ് ഏറ്റെടുക്കുകയാണെന്നും മുഖ്യമന്ത്രി ആരോപിച്ചു.