കൊച്ചി: മോന്‍സണ്‍ മാവുങ്കലുമായി നടി ശ്രുതി ലക്ഷ്മിക്കുള്ള സാമ്പത്തിക ഇടപാടിനെക്കുറിച്ചറിയാന്‍ നടിയെ വിളിച്ചുവരുത്തി ഇ.ഡി ചോദ്യം ചെയ്തു. മൂന്ന് മണിക്കൂറിലധികം നേരം ചോദ്യം ചെയ്തശേഷം വിട്ടയച്ചു. മോന്‍സനുമായി ശ്രുതി ലക്ഷ്മി നടത്തിയ സാമ്പത്തിക ഇടപാടുകളില്‍ വ്യക്തതയുണ്ടാക്കാനാണ് നടിയെ വിളിച്ച് വരുത്തിയത്. എന്നാല്‍ മോന്‍സനുമായി സാമ്പത്തിക ഇടപാടില്ലെന്നാണ് ചോദ്യം ചെയ്യലിന് ശേഷം ശ്രുതി ലക്ഷ്മി മാധ്യമങ്ങളോട് വ്യക്തമാക്കി.

മോന്‍സന്റെ വീട്ടില്‍ നടന്ന പിറന്നാള്‍ നൃത്ത പരിപാടിയില്‍ ശ്രുതി സജീവമായിരുന്നു. തൃശൂര്‍ കരീച്ചിറയില്‍ ശ്രുതി ലക്ഷ്മി നടത്തുന്ന ബ്യൂട്ടി പാര്‍ലറില്‍ മോന്‍സന്റെ സാമ്പത്തിക നിക്ഷേപം ഉണ്ടോ എന്നതടക്കം ഇ.ഡി പരിശോധിക്കുന്നുണ്ട്.

ഡാന്‍സര്‍ എന്ന നിലയില്‍ മോന്‍സന്‍ ക്ഷണിച്ചപ്പോള്‍ നൃത്തം അവസരിപ്പിച്ചതല്ലാതെ മറ്റ് ഇടപാടുകളില്‍ താന്‍ പങ്കാളിയല്ലെന്നാണ് ശ്രുതി മൊഴി നല്‍കിയത്. മോന്‍സനുമായി ബന്ധപ്പെട്ട മറ്റ് കൂടുതല്‍ ആളുകളെ ഇ.ഡി വരും ദിവസം ചോദ്യം ചെയ്യും.