കല്‍പ്പറ്റ: അമ്പലവയലിലെ കൊലപാതകം നടത്തിയത് പ്രായപൂര്‍ത്തിയാകാത്ത രണ്ട് പെണ്‍കുട്ടികള്‍ തന്നെയെന്ന് ഉറപ്പിച്ച് പൊലിസ്. മാതാവിനെ കടന്നു പിടിക്കുന്നത് കണ്ടത് സഹിക്കാനാവാതെയാണ് മുഹമ്മദിനെ കൊലപ്പെടുത്തിയതെന്ന് പെണ്‍കുട്ടികള്‍ മൊഴി നല്‍കി. കോടാലി കൊണ്ടാണ് കൊല നടത്തിയത്. മുറിച്ചു മാറ്റിയ കാല്‍ സ്‌കൂള്‍ ബാഗിലാണ് ഉപേക്ഷിച്ചത്. പെണ്‍കുട്ടികള്‍ പൊലിസിനോട് ഏറ്റു പറഞ്ഞു. സഹോദരനെ വീട്ടില്‍ നിന്ന് പുറത്താക്കിയതിലുള്ള വൈരാഗ്യവും കൊലപാതകത്തിലേക്ക് നയിച്ചതായാണ് സൂചന.
അതേ സമയം പെണ്‍കുട്ടികളെക്കൊണ്ട് മാത്രം ഈ കൃത്യം ചെയ്യാന്‍ കഴിയില്ലെന്നും ബാഹ്യ ഇടപെടലുണ്ടെന്നും ആരോപിച്ച് മുഹമ്മദിന്റെ ഭാര്യ രംഗത്തെത്തി. പെണ്‍കുട്ടികളുടെ പിതാവും മുഹമ്മദുമായി പ്രശ്‌നങ്ങള്‍ ഉണ്ടായിരുന്നു. തന്റെ ആങ്ങളയും പെണ്‍കുട്ടികളുടെ പിതാവുമായ സുബൈറിനും കൊലപാതകത്തില്‍ പങ്കുണ്ടെന്നും പെണ്‍കുട്ടികളുടെ സംരക്ഷണത്തെ ചൊല്ലി തര്‍ക്കങ്ങള്‍ നിലനിന്നിരുന്നുവെന്നുമാണ് മുഹമ്മദിന്റെ ഭാര്യ പറയുന്നത്. പ്രായപൂര്‍ത്തിയാകാത്ത പെണ്‍കുട്ടികള്‍ക്ക് മാത്രമായി ഈ കൊല നടത്താനാകില്ല. തന്റെ സഹോദരനും മകനുമാണ് കൊന്നതെന്നാണ് ഇവര്‍ ആരോപിക്കുന്നത്.

പിതാവ് ഉപേഷിച്ചു പോയ ശേഷം ഇവരുടെ സംരക്ഷണം ഏറ്റെടുത്തിരുന്നത് ബന്ധുവായ മുഹമ്മദായിരുന്നു. എന്നാല്‍ രക്ഷകന്‍ തന്നെ ശിക്ഷകനായപ്പോഴാണ് തങ്ങള്‍ക്ക് ഗത്യന്തരമില്ലാതെ കൃത്യം നടത്തേണ്ടി വന്നതെന്നും പെണ്‍കുട്ടികള്‍ പറയുന്നു.

പത്തിലും പ്ലസ് വണിനും പഠിക്കുന്ന രണ്ട് പെണ്‍കുട്ടികളാണ് കൃത്യത്തിനു പിന്നിലെന്നാണ് പൊലിസ് പറയുന്നത്. ഇന്നലെ ഉച്ചഭക്ഷണം തയ്യാറാക്കുന്നതിനിടെ മുഹമ്മദ് പെണ്‍കുട്ടികളുടെ മാതാവിനെ കടന്നു പിടിക്കുകയായിരുന്നെന്ന് അന്വേഷണ സംഘം പറയുന്നു.
നിലവിളി കേട്ടെത്തിയ കുട്ടികള്‍ സമീപത്തുണ്ടായിരുന്ന കോടാലി കൊണ്ട് മുഹമ്മദിന്റെ തലക്കടിച്ചു. മരിച്ചെന്നറിഞ്ഞതോടെ മൃതദേഹം ഒളിപ്പിക്കാനുള്ള വെപ്രാളത്തിലായിരുന്നു. അതുകൊണ്ട് കത്തി ഉപയോഗിച്ച് വലതു കാല്‍ മുട്ടിനു താഴെ മുറിച്ചു മാറ്റി. ശരീരത്തിന്റെ ബാക്കി ഭാഗം ചാക്കിലാക്കി വീടിനടുത്ത പൊട്ടക്കിണറ്റില്‍ തള്ളി. മൃതദേഹം ചാക്കിലാക്കാന്‍ പെണ്‍കുട്ടികളുടെ മാതാവും സഹായിച്ചു. ശേഷം മറ്റൊരിടത്ത് താമസിക്കുന്ന പിതാവിനെ വിവരം അറിയിച്ചു. തുടര്‍ന്നാണ് പൊലിസ് സ്റ്റേഷനിലെത്തി കുറ്റം ഏറ്റു പറഞ്ഞത്.