തിരുവനന്തപുരം: കണ്ണൂര്‍ വൈസ് ചാന്‍സിലര്‍ നിയമനത്തില്‍ ഹൈക്കോടതി നോട്ടിസ് അയച്ചത് ചാന്‍സലര്‍ക്കാണെന്നും എട്ടാം തീയതി മുതല്‍ താന്‍ ചാന്‍സലര്‍ അല്ലെന്നും ഗവര്‍ണര്‍ ആരിഫ് മുഹമ്മദ് ഖാന്‍. ചാന്‍സലര്‍ സ്ഥാനം ഇനിയേറ്റെടുക്കില്ലെന്ന നിലപാടില്‍ ഉറച്ച് നില്‍ക്കുകയാണ് ഗവര്‍ണര്‍. ഇത് ആവര്‍ത്തിക്കുകയും ചെയ്തു.
സര്‍വകലാശാല വിഷയങ്ങള്‍ കൈകാര്യം ചെയ്യരുതെന്ന് രാജ്ഭവന്‍ ഉദ്യോഗസ്ഥര്‍ക്ക് നിര്‍ദ്ദേശം നല്‍കിയിട്ടുണ്ടെന്നും ഗവര്‍ണര്‍ അറിയിച്ചിരുന്നു.
കര്‍ക്കശമായ നിലപാടില്‍ ഗവര്‍ണറെത്തിയതോടെ സര്‍ക്കാര്‍ വീണ്ടും വെട്ടിലായി. ഇതു സംബന്ധിച്ച ഹൈക്കോടതി അയച്ച നോട്ടിസ് ഗവര്‍ണര്‍ സര്‍ക്കാരിലേക്ക് മടക്കി അയച്ചു.
വൈസ് ചാന്‍സിലര്‍ നിയമനവുമായി ബന്ധപ്പെട്ട് ഹൈക്കോടതി അയച്ച നോട്ടിസ് ഓഫീസില്‍ കിട്ടി, അത് സര്‍ക്കാരിന് കൈമാറാന്‍ നിര്‍ദ്ദേശം നല്‍കിയിട്ടുണ്ട്. ഹൈക്കോടതിയുടെ നോട്ടിസ് ചാന്‍സലര്‍ക്കാണ്. എട്ടാം തീയതി മുതല്‍ താന്‍ ചാന്‍സലറല്ല. നോട്ടിസില്‍ സര്‍ക്കാര്‍ ഉചിതമായ തീരുമാനം എടുക്കട്ടെ എന്നുമാണ് ഗവര്‍ണറെടുക്കുന്ന നിലപാട്.