എറണാകുളം: എറണാകുളം പറവൂരില്‍ യുവതിയെ തീപ്പൊള്ളലേറ്റ് മരിച്ച നിലയില്‍ കണ്ടെത്തിയ കേസില്‍ സഹോദരി അറസ്റ്റില്‍. കാക്കനാട് നിന്നാണ് കൊല്ലപ്പെട്ട വിസ്മയയുടെ സഹോദരി ജിത്തുവിനെ പൊലിസ് പിടികൂടിയത്. വിസ്മയയെ കൊലപ്പെടുത്തിയത് താനാണെന്ന് ജിത്തു മൊഴി നല്‍കി. സഹോദരിയുമായുണ്ടായ വാക്ക് തര്‍ക്കത്തിനൊടുവില്‍ കത്തി ഉപയോഗിച്ച് വിസ്മയയെ കൊലപ്പെടുത്തിയെന്നാണ് ജിത്തുവിന്റെ മൊഴി. മരിച്ചുവെന്ന് മനസ്സിലാക്കി മണ്ണെണ്ണ ഒഴിച്ച് തീയിട്ട ശേഷം വീട്ടില്‍ നിന്നും രക്ഷപ്പെട്ടുവെന്നും ജിത്തു മൊഴി നല്‍കി. മാതാപിതാക്കള്‍ ആ സമയത്ത് വീട്ടിലുണ്ടായിരുന്നില്ല.

ഇന്നലെ പുലര്‍ച്ചെ 1.30ന് കാക്കനാട് വെച്ച് ദുരൂഹ സാഹചര്യത്തില്‍ കണ്ടെത്തിയ ജിത്തുവിനെ പൊലിസ് അഭയകേന്ദ്രത്തിലാക്കിയിരുന്നു. ലക്ഷദ്വീപ് സ്വദേശിയാണെന്നാണ് പൊലിസിനെ അറിയിച്ചത്. പിന്നീട് ലക്ഷദ്വീപ് പൊലിസ് എത്തി ചോദ്യം ചെയ്തുവെങ്കിലും കൃത്യമായ വിവരം ലഭിച്ചില്ല. കയ്യില്‍ പൊള്ളലേറ്റ പാട് കണ്ടതോടെ സംശയം തോന്നി പറവൂര്‍ സ്റ്റേഷനില്‍ വിവരം അറിയിക്കുകയായിരുന്നു. വൈകിട്ട് 5.30ന് ജിത്തുവിന്റെ അറസ്റ്റ് രേഖപ്പെടുത്തി. മാനസികാസ്വാസ്ഥ്യത്തിന് ചികിത്സയിലായിരുന്നി ജിത്തു.

ചൊവ്വാഴ്ചയാണ് പെരുവാരം പനോരമ നഗറില്‍ ശിവാനന്ദന്റെ മകള്‍ വിസ്മയയെ വീട്ടില്‍ പൊള്ളലേറ്റ് മരിച്ച നിലയില്‍ കണ്ടെത്തിയത്. വിസ്മയക്കൊപ്പം വീട്ടിലുണ്ടായിരുന്ന സഹോദരി ജിത്തുവിനെ സംഭവശേഷം കാണാതാവുകയായിരുന്നു. ജിത്തു പെരുവാരം ടൗണിലേക്ക് നടന്നു പോകുന്നതിന്റെ സിസിടിവി ദൃശ്യങ്ങള്‍ കേന്ദ്രീകരിച്ചായിരുന്നു പൊലിസ് അന്വേഷണം.