ദോഹ: ലോകത്തെ ഏറ്റവും മികച്ച വിമാനത്താവളത്തിനുള്ള 'സ്‌കൈട്രാക്സ്' പുരസ്‌കാരം ഖത്തറിന്റെ ഹമദ് അന്താരാഷ്ട്രവിമാനത്താവളത്തിന ലഭിച്ചു. ജര്‍മനിയിലെ ഫ്രാങ്ക്ഫര്‍ട്ടില്‍ നടന്ന പാസഞ്ചര്‍ ടെര്‍മിനല്‍ എക്സ്പോയിലായിരുന്നു പുരസ്‌കാര പ്രഖ്യാപനം. മിഡിലീസ്റ്റിലെ ഏറ്റവും മികച്ച വിമാനത്താവളത്തിനുള്ള പുരസ്‌കാരമാണിത്. തുടര്‍ച്ചയായ പത്താംതവണയാണ് ഹമദിനെ തേടിയെത്തുന്നത്. ഏറ്റവും മികച്ച ഷോപ്പിങ് സൗകര്യം ഒരുക്കിയ വിമാനത്താവളത്തിനുള്ള പുരസ്‌കാരവും ഹമദിന് തന്നെയാണ്.

ലോകത്തെ ഏറ്റവും മികച്ച വിമാനത്താവളത്തിനുള്ള പുരസ്‌കാരം രണ്ടാം തവണയാണ് ഹമദ് അന്താരാഷ്ട്ര വിമാനത്താവളം സ്വന്തമാക്കുന്നത്. യാത്രക്കാര്‍ക്കിടയില്‍ നടക്കുന്ന സര്‍വേയുടെയും വോട്ടിങ്ങിന്റെയും അടിസ്ഥാനത്തിലാണ് 'സ്‌കൈട്രാക്സ്' പുരസ്‌കാരം പ്രഖ്യാപിക്കുന്നത്.

ലോകത്തെ 500ഓളം അന്താരാഷ്്ട്ര വിമാനത്താവളങ്ങള്‍ ഉള്‍കൊള്ളുന്ന മത്സരത്തില്‍ വിവിധ സൂചികകളിലെ പ്രകടനം വിലയിരുത്തിയാണ് സ്‌കൈട്രാക്സ് പുരസ്‌കാരം നിര്‍ണയിക്കുന്നത്. കഴിഞ്ഞ ഒരു പതിറ്റാണ്ട് കാലത്തിനുള്ളില്‍ സൗകര്യങ്ങളിലും സേവനങ്ങളിലും പുലര്‍ത്തിയ മികവിനുള്ള അംഗീകാരമാണ് പുരസ്‌കാര നേട്ടമെന്ന് ഖത്തര്‍ എയര്‍വേസ് ഗ്രൂപ്പ് സി.ഇ.ഒ എഞ്ചി. ബദര്‍ മുഹമ്മദ് അല്‍ മീര്‍ പറഞ്ഞു.