യു.പിയിലെ മീററ്റില്‍ ബി.ജെ.പി സ്ഥാനാര്‍ത്ഥി നടത്തിയ പ്രചരണ റാലിക്കിടെ വ്യാപകപോക്കറ്റടി.
 റാലിയില്‍ പങ്കെടുത്ത പ്രവര്‍ത്തകരുടേയും, റാലി കടന്നുപോയ വഴികളിലെ കച്ചവടക്കാരുടെയും വഴിയാത്രക്കാരുടെയുമെല്ലാം പണം നഷ്ടപ്പെട്ടെന്നാണ് റിപ്പോര്‍ട്ട്. 'രാമായണം' സീരിയലില്‍ ശ്രീരാമനായി അഭിനയിച്ച നടനാണ് മീററ്റിലെ ബി.ജെ.പി സ്ഥാനാര്‍ഥി അരുണ്‍ ഗോവില്‍. സീരിയലിലെ മറ്റ് കഥാപാത്രങ്ങളെ അവതരിപ്പിച്ച താരങ്ങളെ അണിനിരത്തിയായിരുന്നു മീററ്റില്‍ പ്രചാരണ റാലി നടത്തിയത്.വ്യാപാരിയായ കുല്‍ഭൂഷണ്‍ എന്നയാള്‍ 36,000 രൂപ പോക്കറ്റടിച്ചതായി കാണിച്ച് പൊലീസില്‍ പരാതി നല്‍കി.

 റാലി കണ്ടപ്പോള്‍ കടയില്‍ നിന്നിറങ്ങി അടുത്തേക്ക് പോയതാണെന്ന് കുല്‍ഭൂഷണ്‍ പറഞ്ഞു. കടയിലെ പണം പോക്കറ്റില്‍ വെച്ചിരുന്നു. റാലി കണ്ട് തിരികെയെത്തിയപ്പോഴാണ് പോക്കറ്റിലെ പണം നഷ്ടമായത് അറിയുന്നത്,' കുല്‍ഭൂഷണ്‍ പറഞ്ഞു. അതേസമയം പണത്തിന് പുറമെ പലരുടെയും ഫോണുകളും വാച്ചും മറ്റ് വസ്തുക്കളുമെല്ലാം മോഷ്ടിക്കപ്പെട്ടിട്ടുണ്ട്. സംഭവത്തില്‍ അന്വേഷണം ആരംഭിച്ചിട്ടുണ്ടെന്നും മൂന്ന് പേരെ അറസ്റ്റ് ചെയ്തിട്ടുണ്ടെന്നും പൊലിസ് അറിയിച്ചു.