ഇംഗ്ലിഷ് പ്രീമിയര്‍ ലീഗില്‍ ചെല്‍സിക്കെതിരെ ചരിത്ര വിജയവുമായി ആഴ്‌സനല്‍. ഇന്നലെ നടന്ന മത്സരത്തില്‍ എതിരില്ലാത്ത അഞ്ചു ഗോളുകള്‍ക്കാണ് ആഴ്‌സനല്‍ ചെല്‍സിയെ വീഴ്ത്തിയത്. ചെല്‍സിക്കെതിരേ ഗോളടിസ്ഥാനത്തില്‍ ആഴ്‌സനലിന്റെ എക്കാലത്തെയും വലിയ വിജയമാണിത്.

ജയത്തോടെ ആഴ്‌സനല്‍ പ്രീമിയര്‍ കിരീടപ്പോരാട്ടത്തിനുള്ള പട്ടികയില്‍ ഒന്നാം സ്ഥാനത്തേക്ക് കയറി. നിലവില്‍ 34 കളികളില്‍നിന്ന് 77 പോയിന്റാണ് ആഴ്‌സനലിനുള്ളത്. 33 കളികളില്‍ നിന്ന് 74 പോയിന്റുള്ള ലിവര്‍പൂള്‍ രണ്ടാമതും 32 കളികളില്‍ നിന്ന് 73 പോയിന്റുള്ള സിറ്റി മൂന്നാമതുമായി തൊട്ടു പിന്നിലുണ്ട്.

ഒരു ഗോള്‍ പിറന്ന ആദ്യപകുതിക്ക് ശേഷം രണ്ടാം പകുതിയില്‍ നാലു തവണയാണ് ആഴ്‌സനല്‍ എതിര്‍വലയില്‍ പന്തെത്തിച്ചത്. 18 മിനുട്ടുകള്‍ക്കുള്ളിലാണ് ഈ നാല് ഗോളും പിറന്നത്. ആഴ്‌സനലിന്റെ സ്വന്തം തട്ടകമായ ലണ്ടനിലെ എമിറേറ്റ്‌സ് സ്റ്റേഡിയത്ത് നടന്ന മത്സരത്തില്‍ ആതിഥേയര്‍ക്കായി ബെന്‍ വൈറ്റും കൈ ഹാവെര്‍ട്‌സും ഇരട്ടഗോള്‍ നേടിയപ്പോള്‍ ലിയാന്‍ഡ്രോ ട്രൊസാര്‍ഡ് ഒരു ഗോളും നേടി. നാലാം മിനുട്ടില്‍ ട്രൊസാര്‍ഡിലൂടെയാണ് ചെല്‍സി അക്കൗണ്ട് തുറന്നത്. 

ഈ ഗോളോടെ ആദ്യ മത്സരം 1 0ന്റെ ലീഡില്‍ അവസാനിച്ചു. തുടര്‍ന്നുള്ള രണ്ടാം പകുതിയിലാണ് ആഴ്‌സനലിന്റെ ഗോള്‍ മഴ. 52ാം മിനുട്ടില്‍ പ്രതിരോധ താരം ബെന്‍ വൈറ്റിലൂടെ ഗോള്‍. 57ാം മിനുട്ടില്‍ മുന്‍ ചെല്‍സി താരം കൂടിയായ ഹാവെര്‍ട്‌സിന്റെ വക മൂന്നാം ഗോള്‍. 65ാം മിനുട്ടില്‍ ഹാവേര്‍ട്‌സ് തന്റെ രണ്ടാം ഗോളും, 70ാം മിനുട്ടില്‍ വൈറ്റ് തന്റെ രണ്ടാം കൂടി കണ്ടെത്തിയതോടെ ആഴ്‌സനല്‍ ചരിത്രവിജയം ഉറപ്പിച്ചു.