പട്‌ന: ബി.ജെ.പി ദേശീയ അധ്യക്ഷൻ ജെ.പി നഡ്ഡക്കെതിരെ ഗുരുതര ആരോപണവുമായി ആർ.ജെ.ഡി നേതാവ് തേജസ്വി യാദവ് രംഗത്ത്. കഴിഞ്ഞ ദിവസം നഡ്ഡ ബിഹാറിൽ തെരഞ്ഞെടുപ്പ് പ്രചാരണത്തിനായി എത്തിയപ്പോൾ അദ്ദേഹത്തിന്റെ പക്കൽ അഞ്ച് വലിയ ബാഗുകളുണ്ടായിരുന്നതായി തേജസ്വി യാദവ് ആരോപിച്ചു. ഈ ബാഗുകളെല്ലാം പണം നിറച്ച ബാഗുകളാണെന്നാണ് തേജസ്വി യാദവിന്റെ ആരോപണം. ബിഹാറിൽ തിരഞ്ഞെടുപ്പു റാലിയെ അഭിസംബോധന ചെയ്തു സംസാരിക്കുകയായിരുന്നു തേജസ്വി യാദവ്.

തെരഞ്ഞെടുപ്പ് നടക്കുന്നിടത്ത് ഈ ബാഗുകൾ വിതരണം ചെയ്‌തെന്നും തേജസ്വി യാദവ് ആരോപിച്ചു. അന്വേഷണ സംഘങ്ങളുടെ പൂർണപിന്തുണയോടെയാണ് ജെ.പി നഡ്ഡ ഇത്തരം പ്രവർത്തികൾ ചെയ്യുന്നതെന്ന് തേജ്വസി യാദവ് ഉന്നയിച്ചു. ബാഗുകൾ പരിശോധിക്കണമെന്നും തേജസ്വി യാദവ് ആവശ്യപ്പെട്ടു.

അതേസയമയം, ദേശീയ അധ്യക്ഷന് നേരെ ഗുരുതര ആരോപണം ഉന്നയിച്ചിട്ടും വിഷയത്തിൽ ബി.ജെ.പി നേതൃത്വം ഇതുവരെ പ്രതികരിച്ചിട്ടില്ല.