ജറൂസലേം: ഗസ്സ അല്‍ശിഫ ആശുപത്രിയിലെ ഡോക്ടര്‍ ഇസ്‌റാഈല്‍ ജയിലില്‍ പീഡനത്തെ തുടര്‍ന്ന് മരിച്ചു. ഓര്‍ത്തോപീഡിക്‌സ് മേധാവി അദ്‌നാന്‍ അല്‍ ബറാശ് (50) ആണ മരിച്ചത്. അല്‍ശിഫ ആശുപത്രിയിലെ ഡോക്ടര്‍മാരില്‍ പ്രമുഖനാണ് ഇദ്ദേഹം.
വടക്കന്‍ ഗസ്സയിലെ അല്‍ അവാദ ആശുപത്രിയില്‍ രോഗികളെ താല്‍ക്കാലികമായി ചികിത്സിക്കുന്നതിനിടെയാണ് ഇദ്ദേഹത്തെ ഇസ്‌റാഈല്‍ സൈന്യം കസ്റ്റഡിയിലെടുക്കുന്നത്.

ബറാശിനെ പീഡിപ്പിച്ച് കൊന്നതാണെന്ന് ഫലസ്തീന്‍ പ്രിസണേഴ്‌സ് അഫേഴ്‌സ് കമ്മിറ്റിയും ഫലസ്തീന്‍ പ്രിസണേഴ്‌സ് സൊസൈറ്റിയും സംയുക്ത പ്രസ്താവനയില്‍ പറഞ്ഞു.

ഇദ്ദേഹത്തിന്റെ മരണത്തോടെ ഒക്ടോബര്‍ മുതല്‍ ഗസ്സയില്‍ കൊല്ലപ്പെട്ട ആരോഗ്യ പ്രവര്‍ത്തകരുടെ എണ്ണം 496 ആയി. ഏപ്രില്‍ 19ന് ജയിലിലാണ് ബറാശ് മരിച്ചതെന്ന് സന്നദ്ധ സംഘടനകള്‍ അറിയിച്ചു. ഫലസ്തീന്‍ ആരോഗ്യ മന്ത്രാലയത്തിന്റെ കണക്കനുസരിച്ച് 309 ആരോഗ്യ പ്രവര്‍ത്തകരെയാണ് ഇസ്‌റാഈല്‍ ജയിലിലടച്ചത്. 1,500 പേര്‍ക്ക് ആക്രമണങ്ങളില്‍ പരുക്കേറ്റിട്ടുണ്ട്.