തിരുവനന്തപുരം: തമിഴ്നാടിന്റെ അതിര്‍ത്തി ഗ്രാമങ്ങളില്‍ ബയോമെഡിക്കല്‍ മാലിന്യങ്ങളും അജൈവമാലിന്യങ്ങളും തള്ളുന്നതിനെതിരേ ദേശീയ ഹരിത ട്രൈബ്യൂണലും കേന്ദ്ര മലിനീകരണ നിയന്ത്രണ ബോര്‍ഡും കേരളത്തിനെതിരേ രൂക്ഷവിമര്‍ശനം ഉന്നയിച്ചതോടെ അനധികൃതമായി മാലിന്യം തള്ളുന്നത് തടയാന്‍ സംസ്ഥാനം ഒരുങ്ങുന്നു. അന്തര്‍സംസ്ഥാന മാലിന്യങ്ങള്‍ കൊണ്ടുപോകുന്ന എല്ലാ വാഹനങ്ങളില്‍ ജി.പി.എസ് ട്രാക്കിങ് ഏര്‍പ്പെടുത്താനും അത്തരം നിയമലംഘനങ്ങളില്‍ നടത്തുന്ന അനധികൃത സേവന ദാതാക്കളെ പിടികൂടാനുമാണ് പദ്ധതി.

കേരളത്തില്‍നിന്ന് മാലിന്യം കൊണ്ടുപോകുന്ന എല്ലാ വാഹനങ്ങളില്‍ ഒരു മാസത്തിനകം ജി.പി.എസ് സ്ഥാപിക്കുമെന്ന് തദ്ദേശ സ്വയംഭരണ വകുപ്പ് അഡീഷണല്‍ ചീഫ് സെക്രട്ടറി ശാരദാ മുരളീധരന്‍ അറിയിച്ചു.  നിലവില്‍ വീടുകളില്‍നിന്ന് ഉള്‍പ്പെടെ ടണ്‍ കണക്കിന് അജൈവമാലിന്യങ്ങളാണ് ശേഖരിക്കുന്നത്.

ഇതു സംസ്‌കരിക്കുന്നതിന് തമിഴ്നാട്ടിലെ സിമന്റ് ഫാക്ടറികളെയാണ് കേരളം ആശ്രയിക്കുന്നത്. തമിഴ്നാട്ടിലെ ആനമലയ്ക്കു സമീപം കേരളത്തില്‍നിന്ന് അനധികൃതമായി മാലിന്യം തള്ളുന്നതിനെതിരേ ദേശീയ ഹരിത ട്രൈബ്യൂണല്‍ സ്വമേധയാ കേസെടുത്തിരുന്നു. ഇത് അന്വേഷിക്കാന്‍ മലിനീകരണ നിയന്ത്രണ ബോര്‍ഡിനെ ചുമതലപ്പെടുത്തി.

പരിശോധനയില്‍ കേരളത്തില്‍ നിന്നുള്ള ബയോമെഡിക്കലുകളുടെയും മറ്റു മാലിന്യങ്ങളുടെയും കൂമ്പാരം തമിഴ്നാട്ടില്‍ തള്ളിയതായി കണ്ടെത്തിയിരുന്നു. ഇതിനെതിരേ ശക്തമായ നടപടി സ്വീകരിക്കുമെന്ന് ദേശീയ ഹരിത ട്രൈബ്യൂണല്‍ കേരളത്തിന് താക്കീത് നല്‍കിയതിനു പിന്നാലെയാണ് വാഹനങ്ങളില്‍ ജി.പി.എസ് സംവിധാനം ഒരുക്കാന്‍ നിര്‍ദേശം നല്‍കിയത്.