ഹൈദരാബാദ്: ഹൈദരാബാദില്‍ ബുള്ളറ്റ് പൊട്ടിത്തെറിച്ച് 10 പേര്‍ക്ക് പരിക്കേറ്റു. നടുറോഡില്‍വെച്ചാണ് റോയല്‍ എന്‍ഫീല്‍ഡ് ബുള്ളറ്റ് ബൈക്ക് പൊട്ടിത്തെറിച്ചത്. മോഗല്‍പുരയിലെ ബിബി ബസാറില്‍ ഞായറാഴച്ചയാണ് സംഭവം. അപകടത്തിന്റെ ദൃശ്യങ്ങള്‍ സമൂഹമാധ്യമങ്ങളില്‍ പ്രചരിക്കുന്നുണ്ട്. പരിക്കേറ്റവരില്‍ ഒരു പൊലിസുകാരനുമുണ്ടെന്നാണ് റിപ്പോര്‍ട്ട്. 

ഉച്ചയോടെ ബിബി ബസാറിലേക്കെത്തിയ ബൈക്കിന് പെട്ടെന്ന് തീപിടിക്കുകയായിരുന്നു. ബൈക്കോടിച്ച യുവാവ് ചാടിയിറങ്ങുന്നതും ദൃശ്യത്തിലുണ്ട്. ഉടനെ തന്നെ ചുറ്റുമുണ്ടായിരുന്നവര്‍ വെള്ളമൊഴിച്ച് തീ കെടുത്താന്‍ ശ്രമിച്ചെങ്കിലും ഫലമുണ്ടായില്ല. പിന്നാലെ തീ അധികമാവുകയും ബൈക്ക് പൊട്ടിത്തെറിക്കുകയും ചെയ്തു. പൊട്ടിത്തെറിയുടെ ആഘാതത്തില്‍ ചുറ്റിലുമുണ്ടായിരുന്നവര്‍ ദൂരേക്ക് തെറിച്ച് വീഴുന്നത് ദൃശ്യങ്ങളില്‍ വ്യക്തമാണ്. പിന്നാലെ ദേഹത്ത് തീയുമായി ഒരാള്‍ ഓടുന്നതും വീഡിയോയിലുണ്ട്. 

പരിക്കേറ്റവരെ ഉടന്‍ തന്നെ സമീപത്തുള്ള സ്വകാര്യ ആശുപത്രിയില്‍ പ്രവേശിപ്പിച്ചു.