കൊച്ചി: തൃപ്പൂണിത്തറയില്‍ കിടപ്പിലായ പിതാവിനെ വാടക വീട്ടില്‍ ഉപേക്ഷിച്ച് കടന്ന് കളഞ്ഞ മകന്‍ അറസ്റ്റില്‍. പിതാവ് ഷണ്‍മുഖനെ തനിച്ചാക്കിയതിന് മകന്‍ അജിത്താണ് പിടിയിലായത്. തൃപ്പൂണിത്തറ പൊലിസ് സ്റ്റേഷനില്‍ ഹാജരായപ്പോഴാണ് അജിത്തിനെ അറസ്റ്റ് ചെയ്തത്. ഐ.പി.സി 308 പ്രകാരമാണ് കേസ് രേഖപ്പെടുത്തിയത്. 

ഇയാള്‍ക്കെതിരെ ആദ്യം മാതാപിതാക്കളുടെയും മുതിര്‍ന്ന പൗരന്‍മാരുടെയും സംരക്ഷണ നിയമ പ്രകാരമായിരുന്നു കേസ് എടുത്തത്. നഗര സഭാ ചെയര്‍മാന്‍ കെ.കെ പ്രദീപ് കുമാര്‍ നല്‍കിയ പരാതിയുടെ അടിസ്ഥാനത്തിലായിരുന്നു ഇത്. എന്നാല്‍ മകന്‍ ഉപേക്ഷിച്ച് പോയതോടെ ഷണ്‍മുഖന്‍ മരിച്ച് പോകാന്‍ സാധ്യതയുണ്ടെന്ന് ചൂണ്ടിക്കാട്ടിയാണ് ഐപിസി 308 ചുമത്തിയത്. 

പക്ഷാഘാതം വന്ന് കിടപ്പിലായ ഷണ്‍മുഖന്‍ ഒറ്റക്ക് കിടക്കുന്നതായി നാട്ടുകാരാണ് പൊലിസിനെ വിവരമറിയച്ചത്. അവശനിലയിലായ ഇദ്ദേഹത്തിന് നാട്ടുകാരാണ് ഭക്ഷണം നല്‍കിയത്. ഫോണില്‍ ബന്ധപ്പെട്ടപ്പോള്‍ താന്‍ വേളാങ്കണ്ണിയിലാണെന്നാണ് മകന്‍ പറഞ്ഞത്. ശനിയാഴ്ച്ച രാവിലെ പാലിയേറ്റീവ് പ്രവര്‍ത്തകര്‍ വന്ന് ഷണ്‍മുഖനെ തൃപ്പൂണിത്തറ ആശുപത്രിയിലേക്ക് മാറ്റി. ഷണ്‍മുഖന്റെ രണ്ട് പെണ്‍മക്കളും ആശുപത്രയിലെത്തിയിരുന്നു. വൈകീട്ടോടെ താലൂക്ക് ആശുപത്രിയില്‍ നിന്ന് ഷണ്‍മുഖനെ സഹോദരന്‍ വിജയന്റെ ഇടുക്കിയിലെ വീട്ടിലേക്ക് കൊണ്ടുപോയി.