ജറുസലേം: ഇസ്‌റാഈലിനെ വിറപ്പിച്ച് ഹമാസ് ആക്രമണം. ജബലിയയില്‍ സൈനികര്‍ തങ്ങിയ കെട്ടിടത്തിന് നേരെ നടത്തിയ ആക്രമണത്തില്‍ അഞ്ച് സൈനികര്‍ കൊല്ലപ്പെട്ടു. 16 സൈനികര്‍ക്ക് പരുക്കേറ്റു. ഐ.ഡി.എഫ് തന്നെ ഇക്കാര്യം സ്ഥിരീകരിച്ചിട്ടുണ്ട്.

ഗസ്സയില്‍ ഇസ്‌റാഈല്‍ ആക്രമണം ശക്തിപ്പെടുത്തിയതോടെ തന്നെ ഹമാസ് പ്രത്യാക്രമണം തുടങ്ങിയിരുന്നു. റഫയില്‍ ഇസ്‌റാഈല്‍ സൈനികരെ ലക്ഷ്യമാക്കി കഴിഞ്ഞ രണ്ടുദിവസമായി ഹമാസ് ആക്രമണം നടത്തുന്നുണ്ട്. ഈ ആക്രമണങ്ങളില്‍ 25 സൈനികര്‍ക്ക് പരുക്കേറ്റിരുന്നു.

കിഴക്കന്‍ റഫയിലാണ് ഇപ്പോള്‍ ഇസ്‌റാഈല്‍ ആക്രമണം നടത്തുന്നത്. വടക്കന്‍ ഗസ്സയിലെ ജബാലിയയിലും ഇസ്‌റാഈല്‍ ആക്രമണം നടത്തിയിരുന്നു. ഗസ്സയില്‍ കരയാക്രമണം നടത്തുമ്പോഴാണ് ഇസ്‌റാഈലിന് തിരിച്ചടി നേരിടുന്നത്. വീടുകള്‍ക്ക് നേരെയാണ് സൈന്യം ബോംബു വര്‍ഷം നടത്തുന്നത്.

അതേസമയം, റഫയിലെ അതിര്‍ത്തി അടച്ചതോടെ പരുക്കേറ്റവരെ ഗസ്സയ്ക്ക് പുറത്ത് എത്തിക്കാന്‍ കഴിയാത്ത സ്ഥിതിയാ. ഈജിപ്തില്‍ താല്‍ക്കാലിക ആശുപത്രികള്‍ ഗസ്സയില്‍ പരുക്കേല്‍ക്കുന്നവര്‍ക്കായി തയാറാക്കിയിട്ടുണ്ട്. ഇവിടേക്ക് ഇപ്പോള്‍ രോഗികളെ എത്തിക്കാന്‍ കഴിയുന്നില്ല. അതിര്‍ത്തി തുറക്കണമെന്ന് ഇസ്‌റാഈലിനോട് ഈജിപ്തും ആവശ്യപ്പെട്ടിട്ടുണ്ട്.

കൂടാതെ, ഗസ്സയില്‍ ഇസ്‌റാഈല്‍ കൂട്ടക്കുരുതി തുടരുകയാണ്. കഴിഞ്ഞ 24 മണിക്കൂറിനിടെ ഇസ്‌റാഈല്‍ ആക്രമണത്തില്‍ 82 പേരാണ് കൊല്ലപ്പെട്ടത്.  ഈയിടെ ഗസ്സയിലുണ്ടാകുന്ന ഏറ്റവും ശക്തമായ ആക്രമണമാണ് ഇന്നലെ നടന്നത്. 

റഫയില്‍ നിന്ന് 4.5 ലക്ഷം പേര്‍ ഇതിനകം പലായനം ചെയ്തിട്ടുണ്ട്. വടക്കന്‍ ഗസ്സയില്‍ നിന്നും ഒരു ലക്ഷം പേര്‍ പലായനം ചെയ്തു. ഇതുവരെ 35,233 പേര്‍ ഗസ്സയില്‍ കൊല്ലപ്പെട്ടു. 79,141 പേര്‍ക്ക് പരുക്കേറ്റു. ഇന്നലെ ജബാലിയ ആക്രമണത്തിലാണ് കൂടുതല്‍ പേര്‍ കൊല്ലപ്പെട്ടത്. രാത്രിയിലും ആക്രമണം തുടരുന്നതായാണ് റിപ്പോര്‍ട്ട്.