മുംബൈ: ജെറ്റ് എയർവേയ്സ് സ്ഥാപകൻ നരേഷ് ഗോയലിന്റെ ഭാര്യ അനിത ഗോയൽ അന്തരിച്ചു. അർബുദ ബാധിതയായി ചികിത്സയിലിരിക്കെയാണ് മരണം. മുംബൈയിലെ ആശുപത്രിയിലായിരുന്നു അന്ത്യം. സംസ്കാരം  മുംബൈയിൽ നടക്കും.

അനിത ഗോയലിന്റെ ആരോഗ്യസ്ഥിതി കുറച്ചു കാലമായി വളരെ മോശം അവസ്ഥയിലായിരുന്നു. നരേഷ് ഗോയലും അർബുദ ബാധിതനാണ്. നരേഷ് – അനിത ദമ്പതിമാർക്ക് രണ്ടു മക്കളുണ്ട്; നമ്രത, നിവാൻ. 

കള്ളപ്പണം വെളുപ്പിക്കൽ കേസുമായി ബന്ധപ്പെട്ട് ജുഡീഷ്യൽ കസ്റ്റഡിയിലായിരുന്ന നരേഷ് ഗോയൽ നിലവിൽ ജാമ്യത്തിലാണ്. ഭാര്യയുടെ ആരോഗ്യ സ്ഥിതി പരിഗണിച്ചാണ് ബോംബെ ഹൈക്കോടതി ജാമ്യം അനുവദിച്ചത്. രണ്ടു മാസക്കാലത്തേക്ക് ആയിരുന്നു ഇടക്കാല ജാമ്യം. സെപ്റ്റംബർ ഒന്നിനാണ് നരേഷ് അറസ്റ്റിലായത്.