തൃക്കരിപ്പൂര്‍: പൊതുതെരഞ്ഞെടുപ്പിന്റെ ബാലപാഠങ്ങള്‍ പകര്‍ന്ന് മണിയനോടി മമ്പഉല്‍ ഉലൂം മദ്‌റസയില്‍ പാര്‍ലിമെന്റ് തെരഞ്ഞെടുപ്പ്. പൊതുതെരഞ്ഞെടുപ്പിന്റെ വീറും വാശിയും ഒട്ടും ചോരാതെ പ്രചാരണവും വോട്ടുപിടുത്തവുമെല്ലാം അരങ്ങേറി.
മദ്‌റസാ ഹാളില്‍ ഒരുക്കിയ പോളിങ് സ്‌റ്റേഷനില്‍ ക്രമസമാധാനം പാലിക്കുന്നതിന് മദ്‌റസ സ്‌കൗട്ടിനെ അണിനിരത്തിയിരുന്നു. പഴയ ബാലറ്റ് പേപ്പറും സീലുമാണ് തെരഞ്ഞെടുപ്പിന് ഉപയോഗിച്ചത്. എസ്.കെ.ബി.വി പ്രസിഡന്റ്, സെക്രട്ടറി, ട്രഷറര്‍ എന്നീ സഥാനങ്ങളിലേക്കാണ് വോട്ടെടുപ്പ് നടന്നത്. ഒന്‍പതു പേര്‍ മത്സര രംഗത്തുണ്ടായിരുന്നു.
ഓരോ സ്ഥാനാര്‍ത്ഥിക്കും ചിഹ്നങ്ങളും അനുവദിച്ചിരുന്നു. രാവിലെ എട്ട് മുതല്‍ പത്തുവരെയാണ് വോട്ടെടുപ്പ് നടന്നത്. പോളിങ്ങ് ശതമാനം അറിയിക്കാന്‍ വാര്‍ത്താ പ്രക്ഷേപണവും ഒരുക്കിയിരുന്നു.
മദ്‌റസ പ്രധാന അധ്യാപകന്‍ കെ. അബ്ദുറഹീം മുസ്‌ലിയാരുടെ നേതൃത്വത്തിലുള്ള അധ്യാപകരാണ് തെരഞ്ഞെടുപ്പിന് നേതൃത്വം നല്‍കിയത്. തെരഞ്ഞെടുപ്പ് ഫലം ഇന്ന് പ്രഖ്യാപിക്കും.