വിദേശ പഠനം പ്ലാൻ ചെയ്യുന്നവർക്ക് ഏറെ ബുദ്ധിമുട്ടുന്ന ഒരു ഘട്ടമാണ് ഫിനാൻസ് എങ്ങനെ കൈകാര്യം ചെയ്യണം എന്നുള്ളത്. പലപ്പോഴും കോളേജ് ഫീസും താമസ ചെലവുകളും ഒക്കെയാവും ആദ്യം കണക്കുകൂട്ടുക. എന്നാൽ ഇതിനപ്പുറം ഓരോ വിഭാഗങ്ങൾക്കും കൃത്യമായി നീക്കി വെക്കേണ്ട സാമ്പത്തിക വിഹിതത്തെക്കുറിച്ച് നന്നായി അറിഞ്ഞിരിക്കണം. ഇതിനു മുന്നോടിയായി ഒരു സുസ്ഥിരമായ സാമ്പത്തിക നിക്ഷേപം ഉണ്ടായിരിക്കും എന്ന് തന്നെയാണ് പ്രധാന കാര്യം.

◆അപേക്ഷ പ്രോസസിംഗ് ഘട്ടത്തിലെ ഫീസുകൾ

പുറപ്പെടുന്നതിനു മുൻപുള്ള യാത്ര ചെലവ് ഓരോ രാജ്യത്തെയും പ്രോഗ്രാമിനെയും ആശ്രയിച്ച് വ്യത്യാസപ്പെടാം. യുഎസിൽ അപേക്ഷ ചെലവ് ഏകദേശം 150 ഡോളറിന് മുകളിൽ വരും. കൂടാതെ എയർപോർട്ട് നികുതികൾ, വിമാനകൂലി,യാത്ര ഇൻഷുറൻസ് തുടങ്ങിയവയ്ക്കെല്ലാം ആയി ഒരു നിക്ഷേപം ഉണ്ടായിരിക്കണം. ഇത് പഠിക്കാനുദ്ദേശിക്കുന്ന രാജ്യത്തിനനുസരിച്ച് മാറിക്കൊണ്ടിരിക്കും.
SAT,GRE,IELTS,TOEFL തുടങ്ങിയ ഭാഷാപ്രാവീണ്യ ടെസ്റ്റുകളുമായി ബന്ധപ്പെട്ടുള്ള ചിലവുകൾ വേറെയുമുണ്ട്. ചില സർവകലാശാലകൾ പുറത്തുനിന്ന് വരുന്ന വിദ്യാർഥികളിൽനിന്ന് ഓറിയന്റേഷൻ ഫീസായി ഒരു തുക വാങ്ങുന്ന പതിവുമുണ്ട്. ഇതും ഒരു ആഡ് ഓൺ ചെലവ് ആയിരിക്കും. 

◆ആരോഗ്യ ഇൻഷുറൻസും മറ്റ് ചെലവുകളും 

വിദേശ പഠനത്തിൽ ആരോഗ്യ ഇൻഷുറൻസ് ചെലവ് പലപ്പോഴും നാം ആദ്യഘട്ടത്തിൽ പരിഗണിക്കാതെ വരുന്നൊരു ഘടകമാണ്. പൊതുവേ ഒട്ടനവധി കമ്പനികൾ ഇത് ഓഫർ ചെയ്യുന്നുണ്ടെങ്കിലും യൂണിവേഴ്സിറ്റി വാഗ്ദാനം ചെയ്യുന്ന പ്ലാനിൽ അംഗമാവാൻ ആണ് വിദഗ്ധർ നിർദേശിക്കുന്നത്. ഇതിനൊരു പ്രധാനകാരണം ക്യാമ്പസ് ആവശ്യങ്ങളുമായി അത് ബന്ധപ്പെട്ട് കിടക്കുന്നതു കൊണ്ടാണ്. ഇതു കൂടാതെ മറ്റു ബാഹ്യ ചെലവുകളും കണക്കാക്കേണ്ടി വരും. ഇതിൽ പ്രധാനപ്പെട്ടതാണ് കോച്ചിംഗ് ഫീസുകൾ. വിദ്യാർഥികൾക്ക് ഫെലോഷിപ്പുകളോ സ്കോളർഷിപ്പോ ഉണ്ടെങ്കിൽ ഇതിനൊരു ആശ്വാസമുണ്ടാകും. വിദ്യാഭ്യാസ വായ്പകളും സഹായിക്കും. ഏതെങ്കിലും ഒരു വിഷയത്തിൽ പുറകിൽ ആണെങ്കിൽ അത് മറികടക്കാൻ പ്രത്യേക ട്യൂഷനും ആവശ്യമായി വന്നേക്കാം. ഇതും ഒരു അധികച്ചെലവ് ആണ്.

◆താമസ ചെലവുകളും നിക്ഷേപങ്ങളും 

എല്ലാ വിദ്യാഭ്യാസ സ്ഥാപനങ്ങളും യൂണിവേഴ്സിറ്റികളും ക്യാമ്പസിനോട് ചേർന്നു തന്നെ താമസസൗകര്യം ഏർപ്പാടാക്കി തരണമെന്നില്ല. ചിലപ്പോൾ വിദ്യാർഥികൾ തന്നെ അവരുടെ ഉത്തരവാദിത്തത്തിൽ കണ്ടെത്തേണ്ടിവരും. താമസചെലവ് തീർത്തും വ്യക്തി അധിഷ്ഠിതമാണ് ഓരോരുത്തരും എങ്ങനെ അത് കണക്കാക്കി ചെലവഴിക്കണം എന്നും സ്വയം തീരുമാനിക്കുന്നതാണ്. ചെറിയ പട്ടണങ്ങളിലാണ് താമസിക്കുന്നതെങ്കിൽ ചെലവ് കുറയും. അതേസമയം ന്യൂയോർക്ക്, ചിക്കാഗോ പോലുള്ള നഗരങ്ങളിൽ താമസ സൗകര്യം ഏർപ്പെടുത്തുമ്പോൾ അതിനനുസരിച്ചുള്ള ചെലവ് നിങ്ങൾ കണ്ടെത്തേണ്ടിവരും. മുൻപ് പഠിച്ചവരെ ബന്ധപ്പെട്ട് താമസത്തിന്റെ കാര്യത്തിൽ തീരുമാനം എടുക്കുന്നതാവും നല്ലത്. നിക്ഷേപങ്ങൾക്ക് വേണ്ടിയും ഒരു തുക മാറ്റി വയ്ക്കേണ്ടതാണ് വരാറുണ്ട്. ഇത്തരത്തിൽ ചെലവുകളെ കുറിച്ച് വ്യക്തമായി അറിയാൻ യൂണിവേഴ്സിറ്റികളുടെ ഔദ്യോഗിക വെബ്സൈറ്റുകൾ പരിശോധിക്കുന്നത് പലപ്പോഴും നന്നായിരിക്കും. യൂണിവേഴ്സിറ്റികൾ ഫോറിൻ വിദ്യാർഥികളെ ലക്ഷ്യമിട്ട് അവർക്ക് നേരിടേണ്ടിവരുന്ന ചെലവുകളെ കുറിച്ച് ഒരു ഏകദേശ ധാരണ വെബ്സൈറ്റുകളിൽ നൽകും. ഓറിയന്റേഷൻ ഫീസുകൾ ഉണ്ടെങ്കിൽ അവയും ഔദ്യോഗിക വെബ്സൈറ്റുകളിൽ നൽകിയിട്ടുണ്ടാവും. 

വിദേശ പഠനത്തിന് തയ്യാറെടുക്കുന്ന വിദ്യാർത്ഥികൾ ഇത്തരത്തിലുള്ള വിവരങ്ങൾ ഔദ്യോഗിക ശ്രോതസ്സുകളിൽ നിന്നും അറിയാൻ ശ്രമിക്കുക.

കരിയര്‍ വാര്‍ത്തകള്‍ ഓണ്‍ലൈനില്‍ ലഭിക്കാന്‍ ഈ ഗ്രൂപ്പ് ജോയിന്‍ ചെയ്യുക