ഇംഗ്ലീഷ് പ്രീമിയര്‍ ലീഗ് കിരീടം സ്വന്തമാക്കി മാഞ്ചസ്റ്റര്‍ സിറ്റി. തുടര്‍ച്ചയായ നാലാം തവണയാണ് സിറ്റിയുടെ കിരീട നേട്ടം. നിര്‍ണായകമായ അവസാന മത്സരത്തില്‍ ഒന്നിനെതിരെ മൂന്ന് ഗോളുകള്‍ക്കാണ് പെപ് ഗ്വാര്‍ഡിയോളയുടെ സംഘത്തിന്റെ വിജയം. മത്സരത്തില്‍ ഫില്‍ ഫോഡന്‍ ഇരട്ട ഗോള്‍ നേടി. റോഡ്രിഗോയാണ് സിറ്റിയുടെ വിജയം ഉറപ്പിച്ച മൂന്നാം ഗോള്‍ വലയിലെത്തിച്ചത്.

മത്സരത്തിന്റെ ഭൂരിഭാഗം സമയവും മാഞ്ചസ്റ്റര്‍ സിറ്റി പന്തിനെ നിയന്ത്രിച്ചു. രണ്ടാം മിനിറ്റില്‍ ഫില്‍ ഫോഡന്‍ സിറ്റിക്കായി ആദ്യ ഗോള്‍ നേടി. 18-ാം മിനിറ്റില്‍ ഫോഡന്‍ തന്റെ ഗോള്‍ നേട്ടം രണ്ടാക്കി. എന്നാല്‍ ആദ്യ പകുതി പിരിയും മുമ്പെ സിറ്റിക്ക് ആദ്യ തിരിച്ചടി ലഭിച്ചു. 42-ാം മിനിറ്റില്‍ മുഹമ്മദ് കദുസ് വെസ്റ്റ് ഹാമിനായി ആദ്യ ഗോള്‍ വലയിലാക്കി.

രണ്ടാം പകുതിയില്‍ 59-ാം മിനിറ്റിലാണ് റോഡ്രിഗോയുടെ ഗോള്‍ പിറന്നത്. പിന്നെ തിരിച്ചടിക്കാന്‍ വെസ്റ്റ് ഹാമിന് കഴിഞ്ഞില്ല. 38 മത്സരങ്ങളില്‍ നിന്ന് 91 പോയിന്റുകള്‍ നേടിയാണ് മാഞ്ചസ്റ്റര്‍ സിറ്റിയുടെ വിജയം. എവര്‍ട്ടണെ ഒന്നിനെതിരെ രണ്ട് ഗോളിന് തോല്‍പ്പിച്ച ആഴ്‌സണല്‍ 89 പോയിന്റോടെ രണ്ടാം സ്ഥാനത്ത് ഫിനിഷ് ചെയ്തു.