കോഴിക്കോട്: കാലിക്കറ്റ് യൂണിവേഴ്‌സിറ്റി അക്കാദമിക് കൗണ്‍സിലിലേക്കുള്ള ലാംഗ്വേജ് ആന്റ് ലിറ്ററേച്ചര്‍ പ്രതിനിധി തെരഞ്ഞെടുപ്പിലെ റീ കൗണ്ടിങ് നാളെ. എം.എസ്.എഫ് സ്ഥാനാര്‍ഥി ജയിച്ചതിനെ തുടര്‍ന്ന് എസ്.എഫ്.ഐ ആണ് ആദ്യം റീ കൗണ്ടിങ് ആവശ്യപ്പെട്ടത്. ഇതിനെ തുടര്‍ന്ന് നേരത്തെ ഒരു തവണ വോട്ടെണ്ണല്‍ നടത്തിയെങ്കിലും ഇരുവിഭാഗവും തമ്മിലുണ്ടായ തര്‍ക്കത്തെ തുടര്‍ന്ന് റീ കൗണ്ടിങ് നിര്‍ത്തിവെച്ചിരുന്നു. പിന്നീട് മാറ്റിവെച്ച റീ കൗണ്ടിങ്ങാണ് നാളെ നടക്കുക. യൂണിവേഴ്‌സിറ്റി സെനറ്റ് ഹാളില്‍ വെച്ചാണ് വോട്ടെണ്ണല്‍.

ആദ്യ തിരഞ്ഞെടുപ്പ് ഫലങ്ങളില്‍ ലാംഗ്വേജ് ആന്റ് ലിറ്ററേച്ചര്‍ പ്രതിനിധിയായി മത്സരിച്ച എം.എസ്.എഫ് സ്ഥാനാര്‍ഥി 16 വോട്ടിന് ജയിച്ചിരുന്നു. ഇതിന് പിന്നാലെ എസ്.എഫ്.ഐ പ്രവര്‍ത്തകര്‍ പ്രതിഷേധവുമായെത്തി. തുടര്‍ന്ന് റീകൗണ്ടിങ് നടന്നെങ്കിലും ഇരുവിഭാഗവും തമ്മില്‍ തര്‍ക്കമുണ്ടായി. പിന്നാലെ റീ കൗണ്ടിങ്ങും ഫലപ്രഖ്യാപനവും നിര്‍ത്തിവെക്കുകയായിരുന്നു. പ്രതിഷേധത്തിനിടെ എം.എസ്.എഫ്, എസ്.എഫ്.ഐ സംസ്ഥാന നേതാക്കള്‍ കൗണ്ടിങ് കേന്ദ്രത്തിലേക്ക് കയറിയതും വിവാദമായി.