ഫുട്ബോളിൽനിന്ന് വിരമിക്കൽ പ്രഖ്യാപിച്ച് ജർമൻ സൂപ്പർ താരം ടോണി ക്രൂസ്. അടുത്ത മാസം നടക്കാനിരിക്കുന്ന യൂറോ കപ്പിന് ശേഷം രാജ്യന്തര ഫുട്ബോളിൽ നിന്നും ക്ലബ് ഫുട്ബോളിൽ നിന്നും വിരമിക്കും.

റയൽ മാഡ്രിഡാണ് ഇക്കാര്യം ടീമിൻ്റെ വെബ്സൈറ്റ് വഴി അറിയിച്ചത്. പിന്നാലെ ടോണി ക്രൂസ് ഇൻസ്റ്റഗ്രാമിൽ മുഴുനീള കുറിപ്പിലൂടെ 10 വർഷമായി നൽകിയ പിന്തുണയ്ക്ക് റയൽ മാഡ്രിഡ് ക്ലബ് ആരാധകരോട് നന്ദി പറയുകയും ചെയ്തു. നേരത്തേ ജർമൻ ദേശീയ ടീമിൽ നിന്ന് വിരമിക്കൽ പ്രഖ്യാപിച്ച ടോണി, 2024 യൂറോ കപ്പിൽ രാജ്യത്തിനു വേണ്ടി വീണ്ടും ബൂട്ടണിയുമെന്ന് പ്രഖ്യാപിച്ചിരുന്നു. 2014 മുതൽ റയൽ മാഡ്രിഡിനൊപ്പമുണ്ടായിരുന്ന 34കാരൻ, നാല് വീതം ചാംപ്യൻസ് ലീഗ് കിരീടവും ലാലിഗ കിരീടവും അക്കൗണ്ടിലാക്കിയിട്ടുണ്ട്.

'ഇതിനകം തന്നെ റയൽ മാഡ്രിഡിന്റെ ചരിത്രത്തിന്റെ ഭാഗമാകുകയും ഞങ്ങളുടെ ക്ലബ്ബിന്റെയും ലോക ഫുട്ബോളിന്റെയും മികച്ച ഇതിഹാസങ്ങളിൽ ഒരാളാവുകയും ചെയ്ത ടോണി ക്രൂസിനോട് നന്ദിയും സ്നേഹവും പ്രകടിപ്പിക്കാൻ റയൽ മാഡ്രിഡ് ആഗ്രഹിക്കുന്നു'- ടീം വെബ്സൈറ്റിൽ പങ്കുവച്ചു. ജൂൺ ഒന്നിന് വെംബ്ലി സ്റ്റേഡിയത്ത് ബൊറൂസിയ ഡോർട്ട്മുണ്ടിനെതിരേ നടക്കുന്ന ചാംപ്യൻസ് ലീഗ് ഫൈനലാണ് താരത്തിൻ്റെ അവസാന മത്സരം. ശേഷം 2024 യൂറോ കപ്പിനുള്ള ജർമൻ ദേശീയ ടീമിനൊപ്പം ചേരും.