കൊടുങ്ങല്ലൂര്‍: ചന്തപ്പുരകോട്ടപ്പുറം ബൈപ്പാസില്‍ ഇന്നലെയും വാഹനപകടം. ബൈക്ക് യാത്രക്കാരായ ദമ്പതികള്‍ക്ക് കാറിടിച്ച് ഗുരുതരമായ പരുക്കേറ്റു. അഴീക്കോട് പുത്തന്‍പള്ളി പടിഞ്ഞാറ് ഭാഗം പരത്തിയേഴത്ത് ചന്ദ്രബോസ് (55), ഭാര്യ ലളിത (50) എന്നിവരെയാണ് എറണാകുളം മെഡിക്കല്‍ ട്രസ്റ്റ് ആശുപത്രിയില്‍ പ്രവേശിപ്പിച്ചത്. ഇന്നലെ രാവിലെ 11 മണിയോടെ ബൈപ്പാസിലെ പടാകുളം സിഗ്‌നല്‍ പോസ്റ്റിലാണ് അപകടം.
കോഴിക്കോട് നിന്നും ആലപ്പുഴയിലേക്ക് പോകുകയായിരുന്ന ഡോക്ടറും കുടുംബവും സഞ്ചരിച്ച ഇനോവ കാറാണ് ഇടിച്ചത്. കഴിഞ്ഞ ഏതാനും ദിവസങ്ങളായി ബൈപ്പാസ് റോഡില്‍ വാഹനാപകടങ്ങള്‍ നിത്യസംഭവമാണ്. ചന്തപ്പുര മുതല്‍ കോട്ടപ്പുറം വരെയുള്ള അഞ്ച് സിഗ്‌നല്‍ പോസ്റ്റുകളിലാണ് ദിനംപ്രതിയെന്നോണം അപകടങ്ങള്‍ നടന്നുവരുന്നത്. ചന്തപ്പുര-കോട്ടപ്പുറം ബൈപ്പാസ് റോഡിലെ ദിനംപ്രതിയെന്നോണമുള്ള അപകടമരണങ്ങളും, പരുക്കുകളും വലിയ ചര്‍ച്ചയും വാര്‍ത്താ പ്രാധാന്യവും നേടിയിട്ടും അധികൃതര്‍ ഇക്കാര്യം കണ്ടില്ലെന്ന മട്ടിലാണ്. മാസങ്ങള്‍ മുമ്പ് ബൈപ്പാസ് റോഡിലെ അപകടങ്ങള്‍ പരിഹരിക്കണമെന്നാവശ്യപ്പെട്ട് സമരങ്ങള്‍ നടന്നിരുന്നു.