മലപ്പുറം: മലബാറില്‍ 55,897 വിദ്യാര്‍ഥികള്‍ക്ക് പ്ലസ് വണ്‍ സീറ്റില്ല. സംസ്ഥാനത്ത് ആകെ ലഭിച്ച 4,65,960 അപേക്ഷകളില്‍ 2,46,057 അപേക്ഷകളും പാലക്കാട് മുതല്‍ കാസര്‍ക്കോട് വരെയുള്ള മലബാറിലെ ആറ് ജില്ലകളില്‍ നിന്നാണ്. എന്നാല്‍, ഇവിടെ സീറ്റുകള്‍ 1,90,160 മാത്രമാണ്. വയനാട് ഒഴികെയുള്ള മലബാര്‍ ജില്ലകളില്‍ 5133 അപേക്ഷകളാണ് കഴിഞ്ഞവര്‍ഷത്തേക്കാള്‍ വര്‍ധിച്ചത്. എന്നാല്‍, ബാച്ചുകളില്‍ വര്‍ധനവില്ല. തൃശൂര്‍ മുതല്‍ തിരുവനന്തപുരം വരെയുള്ള എട്ട് ജില്ലകളില്‍ നിന്ന് ആകെ ലഭിച്ചത് 2,19,903 അപേക്ഷകളാണ്.

   സര്‍ക്കാര്‍, എയ്ഡഡ് സീറ്റുകള്‍ക്ക് പുറമെ മലബാറിലെ 25,508 അണ്‍എയ്ഡഡ് സീറ്റുകള്‍ കൂടി പ്രയോജനപ്പെടുത്തിയാലും 30,389 വിദ്യാര്‍ഥികള്‍ക്ക് സീറ്റുണ്ടാകില്ല. സംസ്ഥാനത്ത് മലപ്പുറം ജില്ലയിലാണ് പ്രതിസന്ധി  രൂക്ഷമാവുക. ഈ വര്‍ഷം 82,434 അപേക്ഷകളാണ് മലപ്പുറത്ത് ലഭിച്ചത്. മുന്‍വര്‍ഷത്തേക്കാള്‍ 1412 അപേക്ഷകളാണ് വര്‍ധിച്ചത്. ജില്ലയില്‍ ഫുള്‍ എപ്ലസ് ലഭിച്ചവര്‍ തന്നെ 11,974 പേരുണ്ട്. ഇവര്‍ക്ക്  ആഗ്രഹിക്കുന്ന വിഷയത്തില്‍ ചേര്‍ന്ന് പഠിക്കാന്‍ അവസരം ലഭിക്കാത്ത അവസ്ഥയാണുണ്ടാവുക.

മലപ്പുറം കഴിഞ്ഞാല്‍ പ്രതിസന്ധിയേറെയുള്ളത് കണ്ണൂര്‍, കോഴിക്കോട്, പാലക്കാട്, കാസര്‍ക്കോട് ജില്ലകളിലാണ്. കണ്ണൂരില്‍ ഈ വര്‍ഷം മുന്‍വര്‍ഷത്തേക്കാള്‍ 1049 അപേക്ഷകളുടെ വര്‍ധനവുണ്ടായി. കോഴിക്കോട്  958,പാലക്കാട് 992, കാസര്‍ക്കോട് 722 അപേക്ഷകളും കഴിഞ്ഞവര്‍ഷത്തേക്കാള്‍ കൂടി. പ്ലസ് വണ്‍ അപേക്ഷകളിലെ ട്രയല്‍ അലോട്ട്‌മെന്റ് 29ന് പ്രസിദ്ധീകരിക്കും. ഒന്നാം അലോട്ട്‌മെന്റ് ജൂണ്‍ 5നും രണ്ടാം അലോട്ട്‌മെന്റ് 12നും മൂന്നാം അലോട്ട്‌മെന്റ്  19നും പ്രസിദ്ധീകരിക്കും.