വാഷിങ്ടണ്‍: ഇസ്‌റാഈല്‍ നരമേധത്തിനെതിരെ പ്രതിഷേധവുമായി അമേരിക്കയിലെ ചിക്കാഗോ സര്‍വ്വകാലാശാല വിദ്യാര്‍ഥികളും തെരുവില്‍. യൂനിവേഴ്‌സിറ്റിയിലെ ബിരുദദാന ചടങ്ങില്‍ നിന്നും വിദ്യാര്‍ഥികള്‍ വിട്ടുനിന്നു. ചടങ്ങില്‍ നിന്നും ഇറങ്ങി വന്ന വിദ്യാര്‍ഥികള്‍ തെരുവില്‍ പ്രതിഷേധിച്ചു. ഫലസ്തീനെ പിന്തുണച്ചതിന് ചില വിദ്യാര്‍ഥികളുടെ ബിരുദം തടഞ്ഞു വെച്ചിരുന്നു. ഇതിനെതിരേയും പ്രതിഷേധക്കാര്‍ ശബ്ദമുയര്‍ത്തി.

ഫലസ്തീന്‍ പതാകകളുമായാണ് വിദ്യാര്‍ഥികള്‍ തെരുവുകളിലേക്ക് പ്രതിഷേധവുമായി എത്തിയത്.
ഗസ്സയിലെ വംശഹത്യ അവസാനിപ്പിക്കണമെന്ന് മുദ്രവാക്യം തെരുവുകളില്‍ മുഴങ്ങി. ഇതുമായി ബന്ധപ്പെട്ട് പരിപാടിയും വിദ്യാര്‍ഥികള്‍ സംഘടിപ്പിച്ചു. 

തങ്ങളുടെ ബിരുദം തടഞ്ഞുവെച്ചിരിക്കുകയാണെന്ന അറിയിപ്പ് കഴിഞ്ഞ ദിവസമാണ് യൂനിവേഴ്‌സിറ്റിയിലെ നാല് വിദ്യാര്‍ഥികള്‍ക്ക് ലഭിച്ചത്. അച്ചടക്ക നടപടിയുടെ ഭാഗമായിട്ടായിരുന്നു ഇത്തരത്തില്‍ ബിരുദം തടഞ്ഞുവെച്ചതെന്ന് ഇവരെ അറിയിച്ചതായി യൂനിവേഴ്‌സിറ്റിയിലെ ഫലസ്തീന്‍ അനുകൂല വിദ്യാര്‍ഥി കൂട്ടായ്മ അറിയിച്ചു. തങ്ങളുടെ ബിരുദത്തിന്റെ മാത്രം പ്രശ്‌നമല്ലെന്നും ഫലസ്തീനിലെ ജനങ്ങള്‍ അനുഭവിക്കുന്ന ദുരിതങ്ങളാണ് വിഷയമെന്നും വിദ്യാര്‍ഥികള്‍ പറഞ്ഞു.

'ജീവിതത്തില്‍ ഇനിയൊരിക്കലും ഒരു ബിരുദധാരിയാവാനോ ഇത്തരമൊരു ചടങ്ങില്‍ പങ്കെടുക്കാനോ കഴിയാത്ത ഫലസ്തീനിലെ വിദ്യാര്‍ഥികളെ ഓര്‍ക്കുമ്പോള്‍ ഞങ്ങളുടെ ബിരുദം ഒരു പ്രശ്‌നമല്ല' ഹാശ്വേ എന്ന വിദ്യാര്‍ഥി പറഞ്ഞു. അവരുടെ സ്ഥിതിയെന്താണ്. ആരാണവര്‍ക്കു വേണ്ടി പോരാടാനിറങ്ങുക- അദ്ദേഹം ചോദിച്ചു.  

കഴിഞ്ഞ ദിവസം ഫലസ്തീന് പിന്തുണയറിയിച്ച് ബിരുദദാന ചടങ്ങില്‍ നിന്നും മസാച്ചുസെറ്റ്‌സ് ഇന്‍സ്റ്റിറ്റ്യൂട്ട് ഓഫ് ടെക്‌നോളജിയിലെ വിദ്യാര്‍ഥികള്‍ ഇറങ്ങി വന്നിരുന്നു. ഫലസ്തീന്‍ അനുകൂല മുദ്രവാക്യം വിളിച്ച് ഇറങ്ങിവന്ന വിദ്യാര്‍ഥികള്‍ മസാച്ചുസെറ്റ്‌സ് അവന്യുവില്‍ ട്രാഫിക് ബ്ലോക്ക് ചെയ്ത് ഫലസ്തീന്‍ അനുകൂല പ്രതിഷേധം നടത്തി. കഫിയ്യ ധരിച്ചാണ് പല വിദ്യാര്‍ഥികളും ബിരുദദാന ചടങ്ങിന് വേണ്ടി എത്തിയിരുന്നത്. വിദ്യാര്‍ഥി പ്രതിഷേധത്തെ തുടര്‍ന്ന് ഏതാനും സമയം ബിരുദദാന ചടങ്ങ് തടസപ്പെടുകയും ചെയതിരുന്നു. 

ഇസ്‌റാഈല്‍ പ്രതിരോധമന്ത്രാലയവുമായി ചേര്‍ന്ന് സര്‍വ്വകലാ ശാല ഗവേഷണം നടത്തുന്നുണ്ട്.  ഇത് അംഗീകരിക്കാനാവില്ല-പ്രതിഷേധക്കാരിലൊരാളായ ഡേവിങ് ബെര്‍കിന്‍സ്‌കി പറഞ്ഞു. ഗസ്സയില്‍ ഇപ്പോള്‍ ബിരുദദാരികളില്ല. ഒരു സര്‍വ്വകലാശാല പോലും അവിടെ ശേഷിക്കുന്നില്ല. എല്ലാം ഇസ്‌റാഈല്‍ ബോംബിട്ട് നശിപ്പിച്ചു. ഡേവിങ് ബെര്‍കിന്‍സ്‌കി കൂട്ടിച്ചേര്‍ത്തു.