ചന്ദ്രനെക്കുറിച്ച് പഠിക്കാന്‍  കഴിഞ്ഞ മാസം വിക്ഷേപിച്ച ചാങ് ഇ 6 പേടകം ചന്ദ്രന്റെ വിദൂരഭാഗത്ത് വിജയകരമായി ഇറങ്ങിയതായി ചൈന.ഞായര്‍ രാവിലെ 6.23നാണ് സൗരയൂഥത്തിലെ ഏറ്റവും വലിയ ഗര്‍ത്തമായ ദക്ഷിണധ്രുവ-എയ്റ്റ്‌കെന്‍ തടാകത്തില്‍ പേടകം ഇറങ്ങിയത്.ചന്ദ്രന്റെ ഉപരിതലത്തിലുള്ള പാറയും,മണ്ണും പഠിക്കുന്നതിനായിട്ടാണ് ചൈന പേടകം വിക്ഷേപിച്ചിരിക്കുന്നത്. 

മൂന്ന് ദിവസം വരെ ചെലവഴിച്ച് പേടകം ചന്ദ്രന്റെ ഉപരിതലത്തില്‍ നിന്നും വസ്തുക്കള്‍ ശേഖരിക്കുമെന്നാണ് ചൈനീസ് നാഷണല്‍ സ്‌പേസ് അഡ്മിനിസ്‌ട്രേഷന്‍ അറിയിച്ചിരിക്കുന്നത്.വെന്‍ചാങ്ങിലെ ബഹിരാകാശ വിക്ഷേപണ കേന്ദ്രത്തില്‍ നിന്നാണ് പേടകം വിക്ഷേപിച്ചിരിക്കുന്നത്. അതേസമയം 2030ല്‍ മനുഷ്യനെ ചന്ദ്രനിലേക്ക് അയക്കുന്നതിന് മുമ്പ് മൂന്ന് പേടകങ്ങള്‍ വിക്ഷേപിക്കാന്‍ ചൈനീസ് നാഷണല്‍ സ്‌പേസ് അഡ്മിനിസ്‌ട്രേഷന്‍ പദ്ധതിയിടുന്നുണ്ട്.