മലപ്പുറം: പ്ലാസ്റ്റിക്കിനെ പുറംതള്ളി പ്രകൃതിദത്ത ഉല്‍പന്നങ്ങളിലേക്ക് മടങ്ങണമെന്ന സന്ദേശവുമായി കലാകാരന്മാരുടെ കൂട്ടായ്മ വേറിട്ട ഓണാഘോഷത്തിനൊരുങ്ങുന്നു. പ്രൊഫഷനല്‍ ആര്‍ട്ടിസ്റ്റ് അസോസിയേഷന്റെ നേതൃത്വത്തിലാണ് ആഘോഷ പരിപാടികള്‍ നടത്തുന്നത്.
അടുത്തമാസം നാലിന് നടക്കുന്ന ഓണാഘോഷ ഒരുക്കത്തിന്റെ ഭാഗമായി ഫ്‌ളക്‌സ് ബോര്‍ഡുകളും ബാനറുകളും പൂര്‍ണമായും ഒഴിവാക്കിയാണ് പ്രചാരണം നടത്തുന്നത്. തുണിയില്‍ എഴുതിയ ബാനര്‍, പ്ലൈവുഡിലും ഹാര്‍ഡ് ബോര്‍ഡിലും തീര്‍ക്കുന്ന ബോര്‍ഡുകള്‍ തുടങ്ങിയവയാണ് തയാറാക്കുന്നത്. പ്രചാരണത്തിന്റെ ഭാഗമായി മാവേലിയുടെ കൂറ്റന്‍ കട്ടൗട്ടും ഒരുക്കുന്നുണ്ട്. അറുപതോളം പേരാണ് പ്രചാരണത്തിന്റെ ഭാഗമായി പ്രവര്‍ത്തിക്കുന്നത്.