ലിസ്ബണ്‍: തെക്കന്‍ പോര്‍ച്ചുഗലില്‍ വ്യോമാഭ്യാസത്തിനിടെ വിമാനങ്ങള്‍ കൂട്ടിയിടിച്ച് ഒരു പൈലറ്റ് മരിക്കുകയും മറ്റൊരാള്‍ക്ക് പരുക്കേല്‍ക്കുകയും ചെയ്തു. ഞായറാഴ്ച 'വൈകിട്ട് 4:05 ന് ബെജ എയര്‍ ഷോയില്‍ ആറ് വിമാനങ്ങള്‍ ഉള്‍പ്പെടുന്ന ഒരു വ്യോമ പ്രകടനത്തിനിടെയായിരുന്നു അപകടം.  

സ്പാനിഷ് പൗരനാണ് മരിച്ചത്. അപകടത്തില്‍പെട്ട വിമാനത്തിലെ രണ്ടാമത്തെ പൈലറ്റിന് സാരമായി പരുക്കേറ്റതായും ഇയാള്‍ക്ക് അടിയന്തര ചികിത്സ നല്‍കിയശേഷം ബൈജ ആശുപത്രിയില്‍ പ്രവേശിപ്പിച്ചതായും വ്യോമസേന അറിയിച്ചു. 

ആറ് വിമാനങ്ങളും സ്പാനിഷ്, പോര്‍ച്ചുഗീസ് പൈലറ്റുമാര്‍ ഉള്‍പ്പെട്ട 'യാക്ക് സ്റ്റാര്‍സ്' എന്ന എയറോബാറ്റിക് ഗ്രൂപ്പില്‍ പെട്ടതാണെന്ന് വ്യോമസേന അറിയിച്ചു. സോവിയറ്റ് രൂപകല്പന ചെയ്ത എയറോബാറ്റിക് പരിശീലന മോഡലായ യാക്കോവ്‌ലെവ് യാക്ക്52 വിമാനങ്ങളാണ് കൂട്ടിയിടിച്ചത്.

അപകടത്തെ അപലപിച്ച പോര്‍ച്ചുഗല്‍ പ്രതിരോധ മന്ത്രി നുനോ മെലോ അപകടത്തിന്റെ വ്യക്തമായ കാരണം അന്വേഷിക്കുമെന്നു അറിയിച്ചു.