തിരൂര്‍: അബോധാവസ്ഥയില്‍ ആശുപത്രിയിലെത്തിച്ച രണ്ടു വയസുകാരനെ പരിശോധിക്കാതെ മുറിയില്‍ നിന്ന് ഇിറക്കിവിട്ടതായി ആക്ഷേപം. തിരൂര്‍ ജില്ലാ ആശുപത്രിയിലെ കുട്ടികളുടെ ഡോക്ടറായ സബീനക്കെതിരേയാണ് ആരോപണം. തിരൂര്‍ ചെമ്പ്രയിലെ അമ്മേങ്ങര ഉഷ മകന്‍ ദേവപൂജയുമായി ഇന്നലെ രാവിലെ ഏഴരയോടെ ആശുപത്രിയിലെത്തിയിരുന്നു. ഡ്യൂട്ടി ഡോക്ടറെ കാണിച്ചെങ്കിലും എട്ടു മണിക്കു കുട്ടികളുടെ ഡോക്ടര്‍ വന്നിട്ടു കാണിക്കാനായിരുന്നു നിര്‍ദേശം. ഡോ. സബീന എത്തിയ ഉടന്‍ കുട്ടിയുമായി മുറിയില്‍ കയറിയപ്പോള്‍ അനുവാദമില്ലാതെ അകത്തുകയറിയെന്നാരോപിച്ചു ഡോക്ടര്‍ ഇറക്കിവിടുകയായിരുന്നുവെന്ന് ഉഷ പറഞ്ഞു.
കുട്ടി അബോധാവസ്ഥയിലാണെന്നു പറഞ്ഞിട്ടും ക്യൂ നിന്നില്ലെന്ന കാരണത്താല്‍ ഡോക്ടര്‍ ചികിത്സിക്കാന്‍ തയാറയില്ലെന്നും യുവതി പറഞ്ഞു. എന്നാല്‍ ക്യൂവില്‍ നിന്നവരുടെ അഭ്യര്‍ഥനയും ഡോക്ടര്‍ കേട്ടില്ലെന്നും ഉഷ പറയുന്നു. തുടര്‍ന്നു കുട്ടിയെ സമീപത്തെ സ്വകാര്യ ആശുപത്രിയിലെത്തിച്ചാണു ചികിത്സ നല്‍കിയത്.
ജില്ലാ ആശുപത്രിയില്‍ വരുന്ന രോഗികളെയും ബന്ധുക്കളെയും ഡോക്ടര്‍മാര്‍ ശകാരിക്കുന്നതു പതിവാണെന്ന ആരോപണമുണ്ട്. മകനു ചികിത്സ നിഷേധിച്ച സംഭവത്തില്‍ ആരോഗ്യമന്ത്രിക്കും ഡി.എം.ഒക്കും പരാതി നല്‍കുമെന്ന് ഉഷ പറഞ്ഞു.