ഭുവനേശ്വര്‍: ആറാം തവണയും ഒഡിഷയില്‍ മുഖ്യമന്ത്രി പദം ഉറപ്പിച്ചാണ് നവീന്‍ പട്നായിക് തെരഞ്ഞെടുപ്പ് ഗോദയിലേക്ക് ഇറങ്ങിയത്. എന്നാല്‍ മുഖ്യമന്ത്രിയുടെ അനാരോഗ്യം, വി.കെ പാണ്ഡ്യനെ പിന്‍ഗാമിയാക്കുന്നു തുടങ്ങിയ ബി.ജെ.പി പ്രചാരണങ്ങള്‍ ഏശിയെന്നാണ് ഫലം തെളിയിക്കുന്നത്.

ഭരണവിരുദ്ധ വികാരത്തെ മറികടക്കാനുള്ള ശ്രമം ബി.ജെ.ഡിയുടെ ഭാഗത്തുനിന്നുണ്ടായെങ്കിലും തെരഞ്ഞെടുപ്പിനെ സ്വാധീനിച്ചില്ല. 2000 മുതലുള്ള തുടര്‍ച്ചയായുള്ള ബി.ജെ.ഡി ഭരണത്തിലെ മടുപ്പ് ഇക്കുറി പ്രചാരണത്തില്‍ പ്രകടമായിരുന്നു. സ്ഥാനാര്‍ഥി നിര്‍ണയം, ചില നേതാക്കളുടെ അമിതമായ ഇടപെടല്‍, മുഖ്യമന്ത്രിയുടെ അസാന്നിധ്യം എന്നിവ ബി.ജെ.ഡിയെ പ്രതികൂലമായി ബാധിച്ചപ്പോള്‍, ബി.ജെ.പി അവസരം മുതലെടുക്കുകയായിരുന്നു.

ആകെയുള്ള 147 സീറ്റില്‍ 78 സീറ്റു നേടിയാണ് ബി.ജെ.പി കേവല ഭൂരിപക്ഷം മറികടന്നത്. ബി.ജെ.ഡി 51 സീറ്റിലൊതുങ്ങി. കോണ്‍ഗ്രസ് 14 സീറ്റിലും സി.പി.എം ഒരു സീറ്റിലും വിജയമുറപ്പിച്ചു. മൂന്നു സ്വതന്ത്രരും വിജയിച്ചിട്ടുണ്ട്. 2019ല്‍ 112 സീറ്റിലാണ് ബി.ജെ.ഡി വിജയിച്ചത്. അന്ന് ബി.ജെ.പി 23ഉം കോണ്‍ഗ്രസ് 9 സീറ്റിലുമാണ് വിജയിച്ചത്. 

തുടര്‍ഭരണം ലഭിക്കുമെന്ന പ്രതീക്ഷയിലായിരുന്നു ബി.ജെ.ഡി. തെരഞ്ഞെടുപ്പ് പ്രഖ്യാപിക്കുന്നതിന് മുമ്പ് തന്നെ ബി.ജെ.ഡിയെ സഖ്യ കക്ഷിയാക്കാന്‍ ബി.ജെ.പി ശ്രമം നടത്തിയിരുന്നു. എന്നാല്‍, നവീന്‍ പട്നായിക് ഒഴിഞ്ഞുമാറി.