ആലുവയില്‍ ഊബര്‍ ഓട്ടോ ഡ്രൈവര്‍ക്ക് മര്‍ദനം. മെട്രോ സ്റ്റേഷന് മുന്നിലെ മറ്റ് ഓട്ടോറിക്ഷ ഡ്രൈവര്‍മാരാണ് മര്‍ദിച്ചത്. സ്റ്റാന്‍ഡില്‍ ഊബര്‍ ഓട്ടോ ഓടിച്ചതിനാണ് മര്‍ദനം. പരിക്കേറ്റ ആലുവ കുന്നത്തേരി തൈപറമ്പില്‍ സ്വദേശി ഷാജഹാന്‍ ആശുപത്രിയില്‍ ചികിത്സയിലാണ്. ആന്തരിക രക്ത സ്രാവത്തെ തുടര്‍ന്ന് രക്തം ഛര്‍ദിച്ച് കോട്ടയം മെഡിക്കല്‍ കോളേജിലാണ് ഷാജഹാന്‍ ചികിത്സ തേടിയത്.

മര്‍ദനമേറ്റത് ആരോടും പറയാതിരുന്ന ഷാജഹാന് മര്‍ദനമേല്‍ക്കുന്ന ദൃശ്യങ്ങള്‍ സാമൂഹിക മാധ്യമങ്ങളില്‍ പ്രചരിച്ചതോടെയാണ് ബന്ധുക്കള്‍ പോലും സംഭവത്തെ കുറിച്ചറിയുന്നത്. മൂന്നാഴ്ച മുന്‍പ് ആലുവ മെട്രോ സ്റ്റേഷനു മുന്നില്‍ യാത്രക്കാരന് വേണ്ടി ഓട്ടോയുമായി കാത്തു നിന്ന ഷാജഹാനെ അവിടെ ഉണ്ടായിരുന്ന ഓട്ടോ ഡ്രൈവര്‍മാര്‍ മര്‍ദിക്കുകയായിരുന്നു. ഊബര്‍ ഓട്ടോ അനുവദിക്കില്ലെന്ന് പറഞ്ഞായിരുന്നു. ഒരാള്‍ പിടിച്ച് വച്ച ശേഷം മറ്റ് മൂന്ന് പേര്‍ ചേര്‍ന്ന് മര്‍ദിച്ചത്.

അവിടെ നിന്ന് പോയ ഷാജഹാന്‍ ഈ സംഭവത്തെ കുറിച്ച് ആരോടും പറഞ്ഞില്ല. ഒരാഴ്ച മുമ്പ് രക്തം ഛര്‍ദിക്കാന്‍ തുടങ്ങിയ ഇയാളെ കളമശേരി മെഡിക്കല്‍ കോളേജിലേക്കും ഗുരുതരാവസ്ഥയെ തുടര്‍ന്ന് പിന്നീട് കോട്ടയം മെഡിക്കല്‍ കോളേജിലേക്കും മാറ്റി.