തേഞ്ഞിപ്പലം: കാലിക്കറ്റ് സര്‍വകലാശാലാ പാര്‍ക്ക് ഇനി അന്താരാഷ്ട്ര പരിസ്ഥിതി പ്രവര്‍ത്തക ഗ്രെറ്റ തുംബര്‍ഗിന്റെ പേരില്‍ അറിയപ്പെടും. ലോക പരിസ്ഥിതിദിനത്തില്‍ സര്‍വകലാശാല ഇതുസംബന്ധിച്ച പ്രഖ്യാപനം നടത്തി. മനുഷ്യര്‍ നടത്തുന്ന പാരിസ്ഥിതികാതിക്രമങ്ങളെ ധീരമായി പ്രതിഷേധിച്ചു കൊണ്ടിരിക്കുന്ന സ്വീഡിഷ് യുവതിയാണ് ഗ്രെറ്റ.

1999 ജനുവരി 15ന് ഉദ്ഘാടനം ചെയ്ത സര്‍വകലാശാലാ പാര്‍ക്കിന് ആറേക്കര്‍ വിസ്തൃതിയുണ്ട്. ചെടികളും തണല്‍മരങ്ങളും ഫലവൃക്ഷങ്ങളും പുല്‍ത്തകിടികളും നിറഞ്ഞ പാര്‍ക്കിന്റെ മനോഹാരിത ആസ്വദിക്കാന്‍ ശനി, ഞായര്‍ ദിവസങ്ങളില്‍ മാത്രമായി പാര്‍ക്കില്‍ പൊതുജന പ്രവേശനം ചുരുക്കിയിട്ടുണ്ട്.