കോട്ടയം: മദ്യപിക്കാനുള്ള പണം നല്‍കാത്തതിനെത്തുടര്‍ന്നുണ്ടായ വൈരാഗ്യത്തില്‍ അതിഥിത്തൊഴിലാളി മധ്യവയസ്‌കനെ ചുറ്റിക കൊണ്ട് തലയ്ക്കടിച്ചു പരുക്കേല്‍പ്പിച്ചു. സംഭവത്തില്‍ അസം സ്വദേശി ഗോകുല്‍ ഗാര്‍ഹ് (34) യെ പാമ്പാടി പൊലിസ് അറസ്റ്റ് ചെയ്തു. പാമ്പാടി കങ്ങഴ സ്വദേശിക്കാണ് പരുക്കേറ്റത്. ഇയാളുടെ വീട്ടിലെ ജോലിക്കാരനാണ് ഗോകുല്‍. 

ഉടമയുടെ പരാതിയെ തുടര്‍ന്ന് നടത്തിയ അന്വേഷണത്തിലാണ് അസം സ്വദേശി പിടിയിലായത്. പ്രതിയെ കോടതിയില്‍ ഹാജരാക്കിയ ശേഷം റിമാന്‍ഡ് ചെയ്തു.

കഴിഞ്ഞ ദിവസം ഉച്ചയോടെ മധ്യവയസ്‌കന്‍ നടത്തിയിരുന്ന കങ്ങഴയിലുള്ള ഹാര്‍ഡ് വെയര്‍ സ്ഥാപനത്തിലെത്തി പണം ആവശ്യപ്പെട്ട് ഇയാള്‍ ബഹളമുണ്ടാക്കുകയും അവിടെയുണ്ടായിരുന്ന ചുറ്റികയെടുത്ത് തലയ്ക്കടിക്കുകയുമായിരുന്നു.