പാകിസ്ഥാന്റെ എക്കാലത്തെയും മികച്ച ഫാസ്റ്റ് ബൗളര്‍ മുഹമ്മദ് ആമിര്‍ അന്താരാഷ്ട്ര ക്രിക്കറ്റിലേക്ക് തിരിച്ചെത്തുന്നു. 2020 ല്‍ വിരമിക്കല്‍ പ്രഖ്യാപിച്ച അമീര്‍ മൂന്നു വര്‍ഷങ്ങള്‍ക്കു ശേഷമാണ് രാജ്യാന്തര ക്രിക്കറ്റിലേക്കുള്ള തന്റെ മടങ്ങിവരവ് പ്രഖ്യാപിച്ചിരിക്കുന്നത്. ഈ വര്‍ഷം ജൂണില്‍ വെസ്റ്റിന്റീസിലും അമേരിക്കയിലുമായി നടക്കുന്ന ട്വന്റി 20 വേള്‍ഡ് കപ്പിനു മുന്നോടിയായാണ് അമീര്‍ തന്റെ വിരമിക്കല്‍ തീരുമാനം റദ്ദുചെയ്തത.

ടീം സെലക്ഷനു മുന്‍പുതന്നെ അമീര്‍ തീരുമാനം പാകിസ്ഥാന്‍ ക്രിക്കറ്റ് ബോര്‍ഡിനെ അറിയിച്ചിട്ടുണ്ട് എന്നാണ് റിപ്പോര്‍ട്ടുകള്‍. ബോര്‍ഡ് പുതിയ ഏഴംഗ സെലക്ഷന്‍ കമ്മിറ്റിയെ പ്രഖ്യാപിച്ചതിന്റെ തൊട്ടു പിന്നാലെയാണ് ആമിറിന്റെ പ്രഖ്യാപനവും പുറത്തു വന്നതെന്നതും ശ്രദ്ധേയം.

'നമ്മുടെ തീരുമാനങ്ങള്‍ പുനഃപരിശോധിക്കേണ്ട ഘട്ടങ്ങളിലേക്കാണ് ജീവിതം നമ്മെ എത്തിക്കുന്നത്. ഞാനും പിസിബിയും തമ്മില്‍ ചില നല്ല ചര്‍ച്ചകള്‍ നടന്നിട്ടുണ്ട്, അവിടെ എന്നെ ആവശ്യമുണ്ടെന്നും ഇനിയും പാക്കിസ്ഥാനുവേണ്ടി കളിക്കാമെന്നും തോന്നി. പച്ച ജേഴ്‌സി ധരിക്കുകയും എന്റെ രാജ്യത്തെ സേവിക്കുകയും ചെയ്യുക എന്നത് എന്റെ ഏറ്റവും വലിയ ആഗ്രഹമാണ്, അത് തുടരും' ആമിര്‍ പറഞ്ഞു.