തിരുവനന്തപുരം: വിഴിഞ്ഞം അന്താരാഷ്ട്ര തുറമുഖത്തിന്റെ ട്രയല്‍റണ്‍ ഈ മാസം തുടങ്ങുമെന്നും പൂര്‍ണമായും വാണിജ്യ അടിസ്ഥാനത്തിനുള്ള പ്രവര്‍ത്തനങ്ങള്‍ ഡിസംബറിനുള്ളില്‍ ആരംഭിക്കാനാണ് ഉദ്ദേശിക്കുന്നതെന്നും തുറമുഖ മന്ത്രി വി.എന്‍ വാസവന്‍ നിയമസഭയെ അറിയിച്ചു. 

88 ശതമാനം നിര്‍മാണം പൂര്‍ത്തിയായിക്കഴിഞ്ഞു. ഡ്രെഡ്ജിങ് പ്രവര്‍ത്തനങ്ങള്‍ 98 ശതമാനവും പൂര്‍ത്തിയായി. ബ്രേക്ക് വാട്ടര്‍ നിര്‍മാണം 81 ശതമാനവും ബെര്‍ത്തിന്റെ നിര്‍മാണം 92 ശതമാനവും പൂര്‍ത്തീകരിച്ചു. ക്രെയ്നുകള്‍, ടഗ്ഗുകള്‍ തുടങ്ങി ആവശ്യമുള്ള പദ്ധതി ഉപകരണങ്ങളില്‍ ഭൂരിപക്ഷവും തുറമുഖത്ത് എത്തിച്ചു.

കണ്ടെയ്നര്‍ യാര്‍ഡിന്റെ നിര്‍മാണത്തിന്റെ 74 ശതമാനം പൂര്‍ത്തിയായി. മറ്റു കെട്ടിങ്ങള്‍ അവസാനഘട്ടത്തില്‍ എത്തിയിരിക്കുകയാണെന്നും മന്ത്രി പറഞ്ഞു. ഒന്നാംഘട്ടം പൂര്‍ണമായും പ്രവര്‍ത്തനമാരംഭിക്കുമ്പോള്‍ 600 പേര്‍ക്ക് നേരിട്ട് തൊഴില്‍ ലഭിക്കുമെന്നും മന്ത്രി സൂചിപ്പിച്ചു.