തിരുവനന്തപുരം: കുവൈത്തിലുണ്ടായ ദുരന്തത്തിന്റെ പശ്ചാത്തലത്തിൽ ലോക കേരള സഭയുടെ ഉദ്ഘാടന ചടങ്ങ് ഒഴിവാക്കി. ഇന്ന് നടക്കാനിരുന്ന സെമിനാറും മാറ്റി. എന്നാൽ 14, 15 തീയ്യതികളിൽ ലോക കേരളസഭാ സമ്മേളനം നിശ്ചയിച്ച പ്രകാരം നടക്കും. ഇതിനിടെ, കുവൈത്തിലെ തീപിടിത്തത്തിൽ നിരവധി മലയാളികൾ മരിച്ച പശ്ചാത്തലത്തിൽ സംസ്ഥാനത്ത് ഇന്ന് അടിയന്തര മന്ത്രിസഭാ യോ​ഗം ചേരും.

രാവിലെ പത്ത് മണിക്കാണ് മന്ത്രിസഭ യോ​ഗം ചേരുന്നത്. 25 മലയാളികൾ ആകെ മരിച്ചെന്നാണ് പുറത്തുവരുന്ന വിവരം. ഇതിൽ 13 പേരെയാണ് തിരിച്ചറിഞ്ഞത്. ഇവരുടേത് ഉൾപ്പെടെ കുവൈത്ത് ദുരന്തത്തിൽ മരിച്ചവരുടെ മൃതദേഹങ്ങൾ നാട്ടിലെത്തിക്കുന്നതടക്കമുള്ള വിഷയങ്ങൾ യോ​ഗത്തിൽ ചർച്ചയാകും. 

അതേസമയം, ദുരന്തത്തിനെ തുടർന്ന് ലോക കേരള സഭയിലെ  ആഘോഷ പരിപാടികൾ ഒഴിവാക്കിയിട്ടുണ്ട്. 103 രാജ്യങ്ങളിലെ പ്രതിനിധികളാണ് ഇത്തവണ ലോക കേരള സഭയിൽ പങ്കെടുക്കുന്നത്. വെള്ളിയാഴ്ച രണ്ട് മുതൽ മൂന്നര വരെ എട്ട് വിഷയങ്ങളിൽ ചർച്ച നടക്കും. ശനിയാഴ്ച രാവിലെ മുതലാണ് മേഖലാ യോഗവും റിപ്പോർട്ടിംഗും നടക്കുക. തുടർന്ന് എട്ട് വിഷയത്തിലെ ചർച്ചകളുടെ റിപ്പോർട്ട് സമർപ്പണം ഉണ്ടാകും. വൈകീട്ട് സമാപനത്തിൽ മുഖ്യമന്ത്രി മറുപടി പറയും.

എന്നാൽ, മൂന്ന് സമ്മേളനങ്ങളും വിദേശത്തെ മേഖലസമ്മേളനങ്ങളും കേരളത്തിന് എന്ത് നൽകിയെന്ന് പ്രതിപക്ഷം ചോദ്യം ഉന്നയിക്കെയാണ് നാലാം ലോക കേരളസഭക്ക് തുടക്കമാകുന്നത്. സർക്കാരിനോടുള്ള ഭിന്നത തുറന്ന് പറഞ്ഞ് ഉദ്ഘാടകനാകാനുള്ള ക്ഷണം ഗവർണ്ണർ പരസ്യമായി തള്ളിയിരുന്നു.